ويجز: الجلابية لبس البلد اللي إحنا منها.. «ارتداؤها أمر طبيعي»
قال الفنان ويجز إنه ارتدى الجلابية خلال وجوده في حفلة بليبيا، موضحًا أن ظهوره بها جعل الناس تتحدث عن الأمر، رغم أنه يرى أن ارتداء الجلابية أمر طبيعي، وكان من المفترض أن يكون أكثر شيوعًا.
وأوضح خلال لقائها مع الإعلامية إسعاد يونس، ببرنامج «صاحبة السعادة»، عبر شاشة «DMC»، : «حبيت إن أنا مثلًا أطلع بيها مرة، كنا عندنا حفلة في ليبيا، فلبست الجلابية، فالناس كلها بتتكلم عن الموضوع، أنا بقيت اللي هو حاسس إن الموضوع المفروض يبقى عادي أكتر من كده، وإن إحنا نبقى بنلبسها أكتر من كده في العادي».
وأضاف: «حاسس إن دي حاجة فيها إشارة كده إلى إن الجلابية تعني إن ده لبس البلد اللي إحنا منها، عادي، وده اللبس كان الزي الرسمي، ومش من بعيد قوي الناس كلها كانت بتلبس كده».
وتابع: «حاسس إن عادي كل واحد فينا المفروض يبقى عنده واحدة، اثنين، بيلبسهم في أوقات ما يبقى عايز يبقى مرتاح كده، ومش لازم يعني يبقى متكلف قوي، يصلي بيهم الجمعة، ينزل بيهم مع أصحابه، يقعد بالليل، إلخ».
وأشار إلى أنه لا يريد أن تفقد الجلابية طابعها، قائلًا: «حاسس إن هي برده حاجة مش عايزها تفقد إن هي طعمها، وإن بس الشباب يبقوا كمان عندهم استعداد إن هم يلبسوها».
وكان قد سبق وحل ويجز ضيفًا على برنامج صاحبة السعادة في حلقة رأس السنة الميلادية 2021، وقدم وقتها باقة من أشهر أغانيه، كما اشترك مع الفنانة روبي في دويتو تصدر التريند وقتها.
ومن ناحية أخرى، كان قد أحيا ويجز عددًا من الحفلات خلال الفترة الماضية، ومنها حفلًا جمعه بمغني الراب ليجي سي، يوم السبت الماضي، في فرع النادي الأهلي بالمنصورة الجديدة، وشهد الحفل حضورًا جماهيريًا ضخمًا وأجواء مليئة بالحماس والطاقة.
وقدم ويجز وليجي سي خلال حفل النادي الأهلي، باقة من أبرز أغانيهما التي حققت انتشاراً واسعًا بين الجمهور وسط تفاعل كبير من الحاضرين، الذين شاركوا النجمين الغناء ورددوا كلمات الأغنيات على مدار فقرات الحفل.
