إيناس عز الدين تفتح النار على دار الأوبرا المصرية بسبب أزمة في التعيين
خرجت المطربة إيناس عز الدين عن صمتها لتكشف عن عدم تعيينها حتى الآن بشكل رسمي في دار الأوبرا المصرية، بالرغم من عملها بداخلها لمدة ١٧ عام، وذلك من خلال منشور عبر حسابها الرسمي على موقع التواصل الإجتماعي فيسبوك.
إيناس عز الدين تروي أزمتها مع دار الأوبرا
حيث قالت إيناس عز الدين موضحة: "١٧ سنة موظفة بدار الاوبرا المصرية و حتى الآن على باب أول ولم يتم تعييني بشكل رسمي في حين ان ناس جت بعدي و اتعينوا و في حين ان كل شوية يتقالي ورقك ضاع انزل اطلع بدل من اسكندرية و اودي الورق و يتعلق تاني و يضيع تاني و ناس اقدم مني كمان و برضوا مش متعينين حتى مكافأة المولد النبوي و الاعياد اللي كانت حوالي ٢٥٠ جنيه .. اه والله زي ما بقولكم كده اتوقفت و اتلغت في حين ان بعض الموظفين بيصرفوا لنفسهم مكافآت بال ٨٠ و ١٠٠ الف جنيه في الشهر وفيه موظف صارف لنفسه المكافأة و ماضي عليها بصفته كموظف وكلنا عارفين في الاوبرا الكلام ده ومش لوحده دول كتير في حين اننا كفنانين اللي بنشتري افضل لبس و نصرف على مظهرنا و نبذل مجهود و نتمرن و نطلع نعمل حفلات والجمهور بييجي لينا احنا و دخل الاوبرا كله قائم علينا مش بنقبض غير ملاليم و كل المخصصات اللي المفروض نقبضها بتتوزع زي التركة على ناس تانية".
"الموضوع اتكتم عليه"
واستكملت إيناس عز الدين حديثها قائلة: "ده انا من اقل من سنة اكتشفت اني بقبض اقل من اللي المفترض اقبضه بأكتر من ٢٤٠٠ جنيه بقالي سنين و لما اتكلمت وقولت مين اللي كان طول السنين اللي فاتوا بيقبض فلوسي دي و كانت بتروح فين و معنى كده اني ليا أثر راجعي الموضوع اتكتم عليه و السيدة الدكتورة رئيسة الهيئة السابقة بدل ما ترد عليا قالتلي ما تتكلميش معايا بإيدك و غلوشت على كلامي و سؤالي عن فلوسي في اجتماع امام الكثير من الزملاء و قيسوا عليا بقى شوفوا كام واحد بيحصل معاه كده واكتر و فلوسنا مهدورة و بتروح فين و بتتقسم و تتوزع على مين".
