ناهد السباعي: نجاحي واستمراري بسبب حب الجمهور.. مش مهتمة أصلح صورتي قدام الناس

أكدت الفنانة ناهد السباعي أن استمرارها في العمل الفني يرتبط بنجاحها وحب الجمهور لها، وليس بانتمائها إلى عائلة فنية، مشيرة إلى أنها لا تنشغل بمحاولات تغيير صورتها أمام الجمهور أو التفكير في الطريقة التي ينظر بها إليها البعض.

إحنا مبنشتغل شغلانة المعيار الأساسي فيها حب الناس

وقالت خلال مداخلة هاتفية مع الإعلامية نهال طايل في برنامج «تفاصيل» المذاع على قناة «صدى البلد2»: «حاجة متوقعة، وأنا مبفكرش بالطريقة دي، إحنا مبنشتغل شغلانة المعيار الأساسي فيها حب الناس، والاستمرار فيها مش علشان الناس كانت بتحب أهلي، هما توفوا، وفي الأول والآخر هو اللي بيخليكي تشتغلي تاني أو تستمري تاني إنك نجحتي وإن جمهورك بيحبك».

شاركت في فيلم «ريد فلاج» كضيفة شرف رغم صغر مساحة دورها

وحول أعمالها الفنية، أوضحت الفنانة ناهد السباعي أنها شاركت في فيلم «ريد فلاج» كضيفة شرف رغم صغر مساحة دورها، قائلة: «ريد فلاج مش آخر أعمالي، أنا يعني شاركت فيه بجزء بسيط جدًا، أنا كنت ضيفة شرف، وطالما حاجة ناجحة إيه المشكلة أني اشتغل فيها».

وكشفت عن استعدادها لعرض مسلسل «بنات الباشا» في شهر نوفمبر، مضيفة: «ولغاية دلوقتي بقرأ حاجات وبنشوف، لسه ما استقرتش على حاجة».

وعن عدم ارتباطها حتى الآن، قالت إن الأمر يعود إلى القسمة والنصيب، قائلة: «دي حاجة قسمة ونصيب وبتاعت ربنا».

وتحدثت ناهد السباعي عن والدتها الراحلة، مؤكدة اعتزازها بكل ما ورثته عنها، قائلة: «أتمنى يكون فيا كل حاجة من ماما، دي تبقى صفة أنا أفتخر بيها لآخر يوم في عمري».

بشتغل في حاجات بمستوى عالي مع مخرجين كبار

كما أكدت قناعتها بكل ما قدمته خلال مسيرتها الفنية، قائلة: «أنا مقتنعة تمامًا بكل حاجة قدمتها، وبشتغل في حاجات بمستوى عالي مع مخرجين كبار، فمبفكرش بالطريقة دي، أنا شخصيتي بسيطة جدًا في الوسط الفني، ومش مهتمة أصلح صورتي قدام الناس».

وعن علاقتها بالفنانة آية سماحة، أوضحت: «أنا علاقتي بـ آية سماحة كويسة الحمد لله، إحنا صحاب جدًا ومن قبل ما نشتغل مع بعض بقينا صحاب».