بعد تعافيها من السرطان.. آيات أباظة ترد على شائعات ارتباط زوجها عمرو محمود ياسين

ظهرت الإعلامية آيات أباظة لأول مرة على الشاشة بعد غياب دام أكثر من عام ونصف، عقب تعافيها من مرض السرطان، كشفت تفاصيل رحلتها مع المرض ودعم أسرتها لها.

البلاء اختبار من ربنا

قالت آيات خلال تصريحات إعلامية: «الحمد لله.. أيام صعبة تخطيتها بفضل ربنا سبحانه وتعالى، مضيفة: أنا من أول يوم وأنا راضية، وحاسة إنه طالما ربنا اختار لي هذا البلاء يبقى أنا غالية عنده، وهو ده اللي كان مصبرني».

وأضافت: «مش مستوعبة إني خفيت.. مكنتش متخيلة إني ممكن أتعرض للي شفته ده كله، متابعة: الواحد في حياته اليومية مش بيركز إن في حاجات صعبة ممكن يتعرض لها».

لحظة اكتشاف المرض

روت آيات تفاصيل اكتشاف المرض قائلة: «ماكنش ليا أي أعراض.. فجأة بطني ما كانتش مظبوطة، رحت للدكتور وطلب تحاليل بينت كل حاجة على طول».

وتابعت: «جوزي عمر هو اللي كان بيستلم كل التحاليل عشان يهون عليا وأول ما شاف النتيجة وشه اتغير وحسيت إن في حاجة، وقلت له أنا اللي تعبته».

وأوضحت أنها خضعت لعملية جراحية كبيرة استمرت 12 ساعة في أكتوبر الماضي، وبعد المتابعة الأولى اكتشف الأطباء وجود شيء في مكان آخر فبدأت رحلة علاج جديدة.

العلاج هو المتعب.. وأهم حاجة النفسية

أكدت آيات أن أصعب ما في الرحلة كان العلاج وليس المرض نفسه: «أنا بتألم مش من المرض، أنا بتألم من العلاج. هو المتعب أوي. وأهم حاجة في المرض ده النفسية».

وأشارت إلى أن دعم العائلة والأصدقاء كان له دور كبير في تخطيها المحنة: «في ناس عدوا مرحلة الأصدقاء وبقوا أهل. أهلي وصحابي وزمايلي ما صدمونيش.. كانوا على طول معايا».

زوجي مسابنيش لحظة

تحدثت آيات عن مساندة زوجها الكاتب عمر محمود ياسين قائلة: «وقفته جنبي كانت وقفة ولاد أصول بالزيادة، متابعة: كان بيبات معايا في المستشفى هو وأختي، وكان بياخد اللاب توب ويشتغل جنبي الفجر وأنا نايمة».

وعن الشائعات التي طالتها في رمضان الماضي قالت: «كنت لسه صاحية من النوم ولقيت الكلام المكتوب.. أول حاجة فكرت فيها عمر هيقرأ ده إزاي؟ كنت قلقانة على شعوره.. اللي كتب كده كان عايز يعمل مشاكل في البيت».

وأضافت: «عمر وأنا نعرف بعض من وأنا عندي 15 سنة، فأكيد مش كلام هيأثر في علاقتنا. المحن بتزود المحبة جدا.. النهاردة عمر أغلى من قبل كده بكتير».

استمتعوا بكل لحظة صحتكم فيها كويسة

وجهت آيات رسالة لكل مريض قائلة: «بجد النفسية دي أهم حاجة. واللي صحته فيها كويسة يستمتع بأي لحظة وأهم حاجة في الحياة العيلة».

واختتمت حديثها بتوجيه الشكر لكل من دعمها خلال فترة علاجها، مؤكدة أن التجربة جعلتها أقوى: «ما كنتش أتخيل إني أتحمل ده.. فلما اتحملته حسيت إني قويت قوي».