طليق الراحلة ياسمين أبو النجا يكشف مفاجأة : أُجبرنا على الطلاق بالعافية
كشف المخرج خضر محمد خضر، طليق الراحلة ياسمين أبو النجا، ابنة الفنانة المعتزلة نجلاء فتحي، مفاجأة حول علاقته بالراحلة على الرغم من طلاقهما قبل في 2023.
وأكد طليق ياسمين أبو النجا على طلاقتهما الطيبة وأن طلاقهما جاء بالإجبار، مشيرًا إلى انزعاجه من الانتقادات التي توجه إليه بعد دعمه للراحلة بعد وفاتها.
وكتب خضر عبر حسابه على فيسبوك : "على فكرة أنا بعرف أرد كويس وبعرف أحكي كويس، يعني أنا مستعد أحكيلكم عادي عن أسرار بيوتنا اللي محدش يعرفها غير المقربين مننا، وممكن أحكيلكم عن علاقتي الزوجية أنا وياسمين من بعد ما خلفنا، ومن ساعة ما دكاترة فرنسا حذرونا من الحمل مرة تانية، وممكن أحكيلكم عن بداية النهاية من سبتمبر 2024 بعد 18 سنة جواز".
وتابع : “وممكن أحكيلكم مين أجبرني أنا وياسمين على الطلاق بالعافية، وإيه السبب وليه ياسمين ماعرفتش تقف قدام القوة القهرية دي ؟، وممكن أحكيلكم مين اجبرها تسيب البيت 4 اشهر وماترجعش غير لما نتطلق، وبقيت أنا عايش لوحدي 4 أشهر في بيتنا وبنتي عايشة 4 اشهر مع أمي، وهي عايشة 4 أشهر إجباري في بيت تالت”.
وأكمل طليق ياسمين أبو النجا : “وممكن أحكيلكم أنا وياسمين كنا بنتقابل في الشارع اللي ورا بيتهم في السر إزاي، علشان ترجع البيت وفشلنا برضه بسبب القوة القهرية دي، وممكن احكيلكم عن صداقتي أنا وياسمين وعلاقتنا بعد الطلاق، لما رجعت بيتنا وأنا مشيت وقعدت جنب أمي عشان كانت بتتعالج من السرطان، وممكن أحكيلكم عن مكالماتنا أنا وياسمين ورسايلنا كل يوم وزياراتنا كل أسبوع".
وأضاف : “وممكن احكيلكم أنا ليه اتجوزت بعد الانفصال بـ 13 شهر وعملت فرح، بالرغم إن مراتي ماكانش فارق معاها نعمل فرح، وياسمين كانت على علم وزين حضرت الفرح بدون أي مشاكل أو نفسيات، مراتي اللي أنتو نازلين فيها تجريح وتقطيع بدون ذنب”.
وأردف : “زي ما نزلتوا تجريح في ياسمين بدون ذنب لما طلعت معايا في مهرجان الجونة، وسخرتوا منها عشان ماكانش عاجبكم شكلها، واتريقتوا عليها ودمرتولها نفسيتها لمجرد إنها مش شبه أمها، لدرجة إنها حلفت ما تطلعش في مهرجانات تاني من ساعتها ولا نسيتوا؟، كومنتاتكم وجرحكم ليها وسخريتكم منها وألفاظكم النبيلة لسة موجودة على الفيسبوك على فكرة”.
وأكمل طليق الراحلة : “وممكن أحكيلكم مين اللي ضحك على ياسمين ووالدتها وأقنعهم إنها تعمل قسطرة تكميلية في المستشفى بتاعتها، بدل الجراحة التكميلية اللي الدكتور الإسباني رفض يعملها عشان مايحصلش مضاعفات واحتمال وفاة، وحذرها من القسطرة وأنا وزين حذرناها وللأسف عملتها من ورا ضهرنا”.
وواصل : “وممكن أحكيلكم على كل حاجة كل اللي نفسكم تعرفوه، بس بشرط كل واحد فيكم يحكيلنا الأول عن أسرار بيته والخبايا اللي محدش ينفع يعرفها وعلاقتكم كأسرة وعلاقتكم كأزواج، ومين عمل إيه بالتفصيل، ومين راح فين وعلاقتكم الصحية ومشاكلكم النفسية وأسماء الدكاترة اللي بيعالجوكم والأدوية اللي بتاخدوها ومين طلق مين وليه ومين اتجوز مين وليه وإمتى”.
وأضاف : "اللي مستعد يحكي اسرار بيته بالتفصيل على الملاء أنا هحكيله أسرار بيوتنا بالتفصيل، يا إما خليكم في حالكم وسيبوا الناس في حالها، احنا لا علينا دين لحد ولا مطالبين نحكي أسرارنا لحد".
كما كتب طليق ياسمين أبو النجا : “ومن يوم طلاقنا وأنا تحولت من زوج ياسمين لأخوها الثالث مش طليقها، وتحولت ياسمين من زوجتي لأختي التانية مش طليقتي، وغلاوتها في قلبي هتفضل زي غلاوة ندى أختي لآخر يوم في عمري، خيال علمي بالنسبة لكم؟ معلش احنا كنا أسرة خيال علمي".
وتابع : “ادعوا لياسمين بالرحمة والمغفرة وأدعوا لبنتها ولأهلها بالصبر والقوة، وياريت كفاية تريندات وقرف وسيبونا في حالنا بجد”.
واختتم طليق ياسمين أبو النجا : “ملحوظة الصورة دي من يوم حفل تخرج زين من المدرسة، 28 يونيو 2024 يعني بعد الطلاق بستة أشهر”.
