عمره 13 سنة..محمد أنقذ أبوه من المـوت على طريق بني سويف الصحراوي
في موقف إنساني يثبت إن الشجاعة مش مرتبطة بالسن، قدر طفل يبلغ من العمر 13 سنة إنه يتصرف بسرعة وينقذ والده بعدما تعرض لأزمة مفاجئة أثناء وجودهما معًا على طريق بني سويف الصحراوي.
القصة بدأت لما كان محمد رجب راكب مع والده في عربية الشغل، وفجأة الأب تعب بشكل مفاجئ، وبدأ يفقد الوعي ومابقاش قادر يتكلم، لتتحول اللحظات دي لموقف صعب جدًا على الطفل، خصوصًا إنه كان مش عارف يحدد مكانه بالظبط على الطريق.
لكن محمد بدل ما ينهار أو يخاف، مسك التليفون واتصل بالإسعاف، وحاول يشرح حالة والده ويحدد مكانهم على قد ما يقدر.
وفي الناحية التانية، كان عامل الهاتف «صابر» بيتعامل مع الموقف بهدوء ومسؤولية، وفضل على الخط مع محمد يطمنه ويهديه، وفي نفس الوقت بدأ يساعده في تحديد موقعه، لحد ما وجه عربية الإسعاف إنها تشغل السارينة، علشان محمد يسمع صوتها ويقدر يدلهم على مكانه.
وبالفعل، تحرك المسعف «إدوار فتح الله» والمساعد «محمد عرفان» ناحية المكان، وقدروا يوصلوا لمحمد ووالده في حوالي 6 دقايق، رغم إنهم كانوا في منطقة على الطريق الصحراوي.
وفور وصولهم، تعامل الفريق مع حالة الأب ونقله للمستشفى، وهناك تم التعامل مع حالته ومحاولة إنقاذه بعد تعرضه للجلطة.
القصة مش مجرد حكاية طفل عنده 13 سنة وتصرف وقت الأزمة، لكنها كمان رسالة عن التربية والمسؤولية، وعن أب نجح يربي ابنه على الاعتماد على نفسه، وطفل قدر يحافظ على تماسكه في أصعب لحظة.
وكمان بتكشف أهمية الدور اللي قام بيه عامل الهاتف «صابر»، اللي مااستسلمش لصعوبة تحديد المكان، وفضل متابع مع الطفل لحد ما ساعد في توصيل الإسعاف، بجانب المسعف «إدوار فتح الله» والمساعد «محمد عرفان»، اللي وصلوا للمكان في وقت قياسي وتعاملوا مع الحالة.
