"المسلسل للتوعية وليس التعنيف".. راندا إبراهيم تكشف كواليس لعبة جهنم |حوار
تصدرت الفنانة راندا إبراهيم تريند محركات البحث جوجل خاصة بعد تألقه في تجسيد شخصية والدة حسن في مسلسل لعبة جهنم.
وكشفت راندا إبراهيم في حوار خاص مع موقع نيوز رووم تفاصيل عديدة عن العمل، وإليكم نص الحوار:
س: في البداية كيف تم ترشيحك للمسلسل وما الذي جذبك للدور؟
ج: الترشيح جالي من أستاذ إسلام خيري واشتغلنا قبل كده معاه في قهوة المحطة وهو اللي رشحني لأستاذ مجدي الهواري، بعتلنا الأسكريبت واللي جذبني أنه قصة واقعية ضمن القصة الكاملة الورق هايل لنجلاء الحديني.
س: حدثينا عن كواليسك مع الطفل منذر مهران؟
ج: منذر ده سكر، عنده كاريزما وقبول عاليين وكله حيوية ونشاط، أنا حسيته فعلا ابني، وكنت بقعد في الكرفان وقاعدين مع بعض معظم الوقت.
س: في ناس انتقدت المسلسل لأنه بيفتح جرح قديم لأهل الضحية.. ما تعليقك؟
ج: الموضوع بقاله ٥ سنين وشبه اتنسى، واتحكم فيها أحنا بنعيد تمثيلها للتوعية لأن النماذج دي مازالت موجودة وبيدخلوا لولادنا من الألعاب والذكاء الأصطناعي وأحنا مش مسيطرين ومش عندنا التوعية الكفاية، الموبايل بقى في ايد الأطفال والمراهقين وهما بيدخلوا من عن طريقه، فالإعادة للتوعية مش أكتر، اطلعوا منها بمغزى ونهتم بولادنا ومنثقش للناس حتى القريبين، ده هدف الدراما، واللي عرفته أن الأب الحقيقي اتوفى والأم الحقيقية تزوجت وخلفت تاني.
س: ما رأيك في تحربة القصة الكاملة.. وهل كنت تتابعي فيديوهات القصة الكاملة لسامح سند؟
ج: كنت بشوفه كتير، بالأكتر لما اشتغلت في حكاية نرجس في رمضان، بس مش متابعاه لأني مش بحب العنف ومبقدرش أتابع الحاجات دي.
س: ما هو اصعب مشهد جسدتيه خلال المسلسل؟
ج: مشهد الجثة مكنش مشروح في السيناريو، سابلي المشهد ده مفاجئ عشان الصدمة طبيعية، أنا مدخلتش الشقة غير على المشهد، شكل الجثة مكنش قادر يروح من عيني، عيشوني الحالة وفضلت في صدمة لحد تاني يوم، يوم المشهد ده كنا من بليل للفحر بنصور وأنا بدور فعلا عليه أنه ابني، أنا مقدرتش أشوف المسلسل بشوف ريلز بس مش قادرة اتفرج تاني واعيش الوجع تاني.
س: وجهي رسالة للشباب المنغمسين في عالم الدارك ويب؟
ج: الدارك ويب مش معلن بالشكل المباشر هما ناس شغالة من تحت لتحت مع الناس الضعيفة اللي بيعرفوا يسيطروا على عقلهم ومشاعرهم، وأنا من وجهة نظري حاسة أن معظم الجرايم اللي بتحصل مؤخرًا بسبب الدارك ويب، خاصة أن في تمثيل للجثة فده يا سايكو يا بيستغل الفيديوهات ويبيعها للدارك ويب.
س: ما هي رسالتك من مسلسل لعبة جهنم؟
ج: نفسي في مصر المخابرات المصرية لو تقدر تقفل المواقع والصفحات اللي بتدخلنا على الدارك ويب ده هينقذ كتير زي ما قفلوا روبلوكس وقفلوا الحوت الأزرق زمان، محتاجين نتحرك لأن الأطفال هو بذرة المجتمع هما الجيل اللي طالع.
