النائب محمد إسماعيل ينتقد محاسبة العدادات الكودية على أعلى شريحة: «إجحاف للمواطن»
انتقد النائب محمد إسماعيل، عضو مجلس النواب، احتساب استهلاك الكهرباء لأصحاب العدادات الكودية على أعلى شريحة، مطالبا بتطبيق نظام الشرائح وفقا لحجم الاستهلاك، أسوة بباقي المواطنين.
وخلال لقائه مع الإعلامية نهلة عامر، في بودكاست «الكلام على إيه»، المذاع عبر منصة «كواليس برلمانية»، أشار إسماعيل إلى أن نظام «الممارسة» كان يتيح توصيل الكهرباء لبعض الوحدات مقابل مبلغ ثابت، بغض النظر عن كمية الاستهلاك.
وقال: «المواطن اللي ما عندوش كهربا في البيت، بيعملوا له حاجة اسمها ممارسة، وبيقولوا له: أنت مخالف، بس هنديك كهربا.. الممارسة دي كانت بتخلي كل شقة تدفع ألف جنيه مثلا، من غير عداد».
ولفت إلى أن دفع مبلغ ثابت كان يدفع بعض المواطنين إلى زيادة الاستهلاك، موضحا: «كل واحد دافع ألف جنيه، وبالتالي أنا هوفر ليه؟ لو أنا عندي مكيفات هشغلها كلها، لو أنا عندي سخان هشغله، في الآخر أنا مش فارق معايا، بدفع ألف جنيه وبس».
وأضاف أن ارتفاع معدلات الاستهلاك مقارنة بالمبالغ المحصلة أدى إلى الاتجاه لتركيب العدادات، قائلا: «الكهربا لقوا إن هما عندهم معدلات الاستهلاك أعلى بكتير جدا من الفلوس اللي بتتجمع، وبالتالي كان لازم يبقى فيه حل. إيه بقى الحل؟ إحنا نركب الوحدات دي، نركب لهم عداد».
وانتقد إسماعيل وضع أصحاب العدادات الكودية على أعلى شريحة، مشيرا إلى اختلاف شرائح الاستهلاك بين المواطنين، وقال: «الغلبان اللي بيستهلك مائة كيلو غير اللي يستهلك خمسمائة كيلو، غير اللي يستهلك ألف كيلو، الشريحة اللي بتتعامل بها الناس مختلفة».
وتساءل: «طب ليه لما قررنا للناس دي هنلغي فكرة الممارسة ونقول له تعالى أنا هركب لك عداد، إن أنا عامل كل المواطنين دول على أعلى شريحة؟ إيه المنطق؟»
وأشار إلى الفارق في قيمة المبالغ التي يسددها المواطنون، قائلا: «اللي كان بيدفع ألف جنيه مثلا نفسه بيدفع 3 آلاف جنيه، لأنه أعلى شريحة في استهلاك الكهربا. زيه زي اللي استهلك قليل، استهلك كتير، بيتعامل على أعلى شريحة».
ووصف إسماعيل الأمر بأنه «إجحاف»، مؤكدا أن مطالبات قدمت في مجلس النواب بتطبيق الشرائح على العدادات الكودية، وقال: «العدادات الكودية دي تتعمل بشرائح زي البيوت العادية بس، وكل واحد يستهلك يدفع على قد استهلاكه».
