تطبيق قانون 73.. النائب عصام خليل: القانون جيد لكن التطبيق خاطئ
علق النائب عصام خليل، عضو مجلس الشيوخ، ورئيس حزب المصريين الأحرار، على مقترح فصل المتعاطي من أول تحليل إيجابي قائلا: «الفكرة بتاعتها جيدة لكن تطبيقها خطأ بمعنى إن أنا لما أعمل تحليل لبعض من الناس مثلا بقول: انت عندك مخدرات في الدم يبقى انت هتتفصل.. طبعا كده انت بتحكم عليه بالإعدام».
وتابع خلال لقاء مع الإعلامية رشا البعل ببودكاست راقب نائب، على نيوز رووم: «لازم هذا الرجل حتى لو هو متعاطي مخدرات أديه فرصة.. مش انت عندك مخدرات تتفصل.. انت لازم تتعالج ويتعملك تحليل وهتفضل في شغلك وفي 6 شهور لازم نعرف إيه الأدوية اللي بياخدها».
وطالب بمعرفة أنواع الأدوية التي يحصل عليها، قائلا: «العاملين في شركات البترول بيبقى صدرهم تعبان فبياخد أدوية تطلع نتيجتها كما لو كان يتعاطى مخطرات.. عشان كده اللي بيعمل التحليل لازم أول سؤال يسأله أيه نوع الدواء اللي بياخدو ولازم تبقى معاها روشتة من طبيب.
واستثنى من ذلك بعض الوظائف قائلا: «لكن في وظائف معينة مينفعش فيها الكلام ده زي السائق ده لا ينفع 6 شهور ده خلاص بتتسحب منه الرخصة.. ولو هو بطل شرب مخدرات نشوف بقى ممكن أن تعاد الرخصة».
