عصام سراج الدين يكشف كواليس ارتفاع أسعار اللاعبين في مصر
تحدث عصام سراج الدين، مدير التعاقدات بالنادي الأهلي، عن الارتفاع الكبير في أسعار اللاعبين داخل الدوري المصري، وكواليس المفاوضات مع الأندية خلال الفترة الأخيرة.
وقال أحمد بلال خلال الحوار: «دلوقتي بقى فيه أرقام غريبة جدًا في الدوري المصري، الأهلي يطلب لاعب يبقى بـ100 مليون جنيه، ونادي تاني يطلب نفس اللاعب برقم أقل».
ورد عصام سراج الدين قائلًا: «على مدار العشر سنين الأخيرة حصلت قفزة مبالغ فيها في أسعار اللاعبين. وإحنا اتعاقدنا مع لاعبين من نادي إنبي، علي محمود وأقطاي، وحابب أشكر أيمن الشريعي».
وأضاف: «في الأول طلب أرقام كبيرة وفقًا لمعطيات السوق، وإن الأهلي بقى مؤشر للسوق وبيشتري لاعبين بأرقام كبيرة. وهو تحدي كبير إنك تحاول تظبط إيقاع الأداء المالي لأسعار السوق وانتقالات اللاعبين».
وتابع: «الشريعي راجل تجاري وشاطر، وهو متعب جدًا وبيني وبينه عشم، لكن الواحد كان عنده صبر معاه لفترة كبيرة، وفهمته إننا في الآخر لما نظبط معدل الإيقاع المالي هيبقى في صالح كل الأندية، وهو تفهم الأمر».
وأوضح مدير التعاقدات بالأهلي: «قولتله إن سياستنا كنادي الأهلي في شراء اللاعبين هتتغير، وهيبقى فيه سقف مش هنطلع عنه لشراء اللاعيبة».
واختتم: «هنحاول ندي فرص لولادنا في قطاع الناشئين، وهنحاول يبقى فيه تعاون مثمر مع رؤساء الأندية كلها، لأن ضبط أسعار اللاعبين هيكون في صالح الكرة المصرية وكل الأندية».
