عمرو رمزي يكشف أغرب مواقف «حيلهم بينهم»: شعبان عبدالرحيم طلعلي مطوة
استرجع الفنان عمرو رمزي، ذكريات برنامج المقالب الذي قدمه «حيلهم بينهم»، مشيرا إلى أن أحد أصعب وأغرب المواقف التي مر بها، وكانت في حلقة المطرب شعبان عبدالرحيم.
وأضاف، خلال استضافته في برنامج «ست الستات» المذاع عبر شاشة دي إم سي: «شعبان عبدالرحيم فتح مطوة في الحلقة، وطبعا ده كان أغرب موقف موجود.. يعني أنا كنت بقول مقدمة طويلة وتقيلة لقيته قالي شعبولي العملية شوية، قلتله لأ دي أقل حاجة، افتكر وقتها تقريبا إني بشتمه ولقيته جاب مطوة كان شايلها في الشراب وفتحها عليا».
وواصل: «أكيد طبعا وقتها معرفتش أتصرف وقلتله إن ده كان مجرد مقلب ومش لازم كل ده».
وخلال الحلقة، أكد أن الإعلامية القديرة سناء منصور تعد السبب الرئيسي في دخولة مجال الإعلام، موجها لها الشكر على هذه الفرصة.
كما تحدث الفنان عمرو رمزي، عن رأيه في الطرف الثالث في العلاقات، مؤكدا أنه ضد هذا المفهوم شكلا وموضوعا، وقال: «أنا بشوف إن مفينعش يكون في طرف تالت ولا صديق قريب للراجل أو للست، هما لازم يكونوا أقرب اتنين لبعض».
وأضاف: «الراجل اللي مراته مش أقرب حد ليه بيكون عنده مشكلة حقيقية.. لأن ده معناه إن في حد ممكن يتبنى وجهة نظره وده ممكن يسخنه على زوجته لأن مفيش حد عارف طبيعة العلاقة بينهم غيرهم».
وأكد عمرو رمزي، أن وجود أطراف في علاقة الزوجين هي بداية الخراب، قائلا: «لما طرف تالت يدخل بينهم ويسخن أو يقول رأيه دي بداية الخراب».
