بعد القبض على إسماعيل دولار.. مالك كافيهات بالمقطم يكشف مفاجآت مدوية
كشف أحمد شقوير مالك كافيهات «24 كي» في المقطم، تفاصيل الأزمة التي شهدتها المنطقة، والتي انتهت بالقبض على إسماعيل دولار وعدد من الأشخاص، موضحا أن الواقعة جاءت على خلفية نزاع قانوني مع الشركة المسؤولة عن إدارة المشروع.
نزاع قانوني بين الشركة والكافيه
وقال شقوير خلال مداخلة هاتفية ببرنامج «آخر النهار»، المذاع على قناة النهار: «إحنا مجموعة كافيهات 24 كي في المقطم، اللي هو الكورنيش الجديد، إحنا في نزاع قانوني ما بينا وما بين الشركة اللي هي واخدة إدارة المشروع، الشركة دي اسمها تابع لشركة SSG، بتقول إن في 10% زيادة سنوية».
ملتزمين بالإيجارات والمستحقات
وأضاف: «إحنا معانا عقود من فترة، من أول ما خدنا الأماكن إيجارات والعقود دي ملتزمين بها وملتزمين بالإيجارات وبكل المستحقات اللي علينا»، موضحا أن العقود تنص على زيادة سنوية بنسبة 10%، قائلا: «العقود دي بتقول إن في 10% زيادة سنوية».
زيادات تصل إلى 25% بأثر رجعي
وتابع شقوير: «مع أول سنة زودنا الـ10%، فوجئنا بأن الشركة بتطالبنا بزيادات تانية مالهاش علاقة بنص العقود أو بالشروط اللي موجودة في العقود».
وأضاف: «الزيادات دي عبارة عن 25% زيادات سنوية، منهم 10% الإجبارية واللي هي الأساسية ملزمين بيها، و15% تانية لم ينص عليها العقد، مطلوب مننا 10% زيادة كمان عبارة عن خدمات وصيانة للمشروع».
وأوضح أن هذه الزيادات كانت مطلوبة بأثر رجعي، قائلا: «الحاجات دي كمان والزيادات اللي مطلوبة دي مطلوبة بأثر رجعي عن سنة 2025 و2026».
«رفضنا الزيادات والشركة بدأت تضغط علينا»
وأشار مالك الكافيهات إلى أنهم رفضوا الزيادات، قائلا: «قابلنا الموضوع مننا بالرفض، ليه يا جماعة بتعملوا كده؟ وليه بتقول لي الكلام ده؟ أنا في عقد بينص ما بيني وما بين حضرتك، أنا ملتزم بشروط وملتزم بالاستحقاقات اللي عليا، فحضرتك ما ينفعش تطالبني ببره العقود».
وأضاف: «الشركة بدأت تضغط علينا بمستلف باهي سليمان، اللي هو صاحب الشركة، بمحاولة قطع الكهرباء، قطع الميه، قطع الخدمات، والكافيهات والمطاعم مستحيلة تشتغل من غير كهرباء ومن غير ميه».
وأوضح أن الخلافات استمرت لمدة عام تقريبا، قائلا: «فبدأنا ندخل مع بعض في جدال ونقاش على مدار تقريبا سنة كاملة، تخلل فيها قطع تيار، قطع كهرباء، قطع ميه، كنا بنلجأ دايما للحلول القانونية بتاعتنا».
«فوجئنا بإسماعيل دولار ومجموعة من الأشخاص»
وكشف شقوير تفاصيل الواقعة الأخيرة، قائلا: «لحد امبارح فوجئنا إن في مجموعة من الشركة بيترأسهم مدير أمن من الشركة، من الحراسات، معاهم إسماعيل دولار ومجموعة من الأشخاص جايين يعتدوا على الأماكن من خلال قطع التيار الكهربي».
وتابع: «يا جماعة بتعملوا إيه؟ الموضوع إيه؟ الموضوع حصل ما بينا وما بينهم جدال ونقاش شوية. لا، إنتوا... إحنا جايين نقطع التيار، وإحنا جايين نقطع الكهربا، وإحنا لينا حق وإنتوا ما بتدفعوش. يا جماعة إنتوا مالكوش صفة، لحد ما توصلنا لحد من الشركة».
وأوضح: «هم كان الموضوع خلاص يعني، هم بيقطعوا الكهرباء وفي احتكاك جامد جدا معانا، كان هيوصل لحد اعتداء بالأيدي، والألفاظ بدأت طبعا، بالألفاظ كتير، كنا إحنا أخدنا إجراء بأن إحنا طلبنا النجدة».
«مكملناش 7 أو 8 دقايق والنجدة وصلت»
وقال شقوير: «الناس مشكورة طبعا، مكملناش سبع 8 دقايق، لأن إحنا قريبين جدا من قسم المقطم، كانوا الناس موجودين، إدارة المباحث الممثلة في السيد رئيس المباحث والقوة اللي معاه».
وأضاف: «روحنا كلنا لكل الأطراف على القسم، وبناء عليه أخدنا الإجراءات الرسمية بتاعتنا، وأثبتنا الواقعة في الموضوع، وتم التحفظ على الأطراف».
«سنة من البلطجة»
وأكد شقوير أن الأزمة مستمرة منذ أكثر من عام، قائلا: «القصة اللي إحنا عايشين فيها بقالنا سنة ولا سنة وشوية، بتمارس علينا كثير من البلطجة، اللي مش عايز أقول لحضرتك يعني إيه، لا ترتقي لدولة قانون إحنا عايشين فيها».
وتابع: «إحنا طبعا بنثق في دولتنا جدا جدا، بنثق في إن إحنا في دولة قانون وهناخد حقنا بالقانون».
«إسماعيل دولار مش موظف في الشركة»
وحول علاقة إسماعيل دولار بالشركة، أوضح شقوير: «لا، خالص يا فندم، أول مرة نشوفه وأول مرة يبقى متواجد. الشركة استعانت بيه امبارح».
وأضاف: «استعانت بيه بالضبط، اللي هو باهي سليمان، اللي هو رئيس مجلس إدارة الشركة والمسؤول عن الشركة، استعان بيه».
وقال: «تمام، يعني إحنا بنعتبر إن ده كارت إرهاب أو تهديد لينا، ولكن زي ما قلت لحضرتك، إحنا في دولة قانون».
مطالب مالك الكافيهات
وحول مطالبه بعد إحالة الواقعة إلى النيابة، قال شقوير: «محتاجين إن إحنا الحماية لينا وللأماكن اللي مفتوحة، اللي بيشتغل فيها أكتر من 4 آلاف أو 5000 عامل وموظف، طالبين حماية من الدولة»، مضيفا: «طالبين عدم إرهاب للموظفين والناس اللي شغالة في عدم وجودنا أو حتى في وجودنا، والالتزام بالعقود الموقعة».
واختتم شقوير حديثه قائلا: «أضيفها، إن الممارسات اللي بتتم علينا والتهديدات اللي بتتم في خصوص الموضوع، وإجبارنا على التنازل أو توجيه الموضوع إن إحنا نتنازل عن المحاضر، إحنا بنثق في الدولة جدا ومكملين في الموضوع لأن حقنا».
