«كله هيقبض».. النائبة وفاء رشاد: على مسؤوليتي أزمة المعاشات هتتحل

أكدت النائبة وفاء رشاد أن أزمة المعاشات ومشكلات السيستم المتعلقة بها ستشهد حلا قريبا، مشددة على أن أصحاب المعاشات يمثلون شريحة مهمة تستحق الدعم والرعاية من الدولة.

حل مشكلة المعاشات قريبا 

وقالت وفاء رشاد، خلال لقائها ببرنامج «كواليس برلمانية» ضمن برنامج «راقب نائب»: «موضوع المعاشات ده إن شاء الله بإذن الله هيحل قريبا جدا جدا لأن أصحاب المعاشات دول فوق الرؤوس كلها والله».

وعن دورها في أزمة المعاشات، أوضحت النائبة أن أصحاب المعاشات يمثلون شريحة تحتاج إلى وقوف الدولة بجانبها، قائلة: «دول شريحة تحتاج إن الدولة المصرية لازم تقف معاهم بصراحة مروا بأزمات قوية جدا».

شعور بأزمات المواطن

وحول ما إذا كانت تؤكد أن أزمة المعاشات ستنتهي قريبا، قالت وفاء رشاد: «يا فندم هيتحل إن شاء الله بإذن الله، مفيش حاجة مش هتتحل».

وأضافت: «شوفي، أنت عندك مشكلة، في ناس بتشتغل عليها، في ناس والله بتشتغل، يعني مش هقول لك إن أنا مثلا.. هل معقولة في عاقل في الدولة دي ممكن يقول إن أزمة زي أزمة معاشات محدش هيفكر فيها؟ محدش هيفكر في الشريحة العريضة دي؟ لا، مين قال كده؟».

وتابعت: «ناقشناها في مجلس الشيوخ، اتناقشت في مجلس الشعب.. لا معلش، اتناقشت، اتناقشت وهتتناقش، ومحدش هيسيب ده، لأن دول أصحاب حقوق».

وشددت النائبة وفاء رشاد على أن أصحاب المعاشات من أصحاب الحقوق، ومن حقهم المطالبة بحياة كريمة، قائلة: «فمن حقهم إن هم يزعلوا، ومن حقهم إن هم يغضبوا، لأن أنت عايز حياة كريمة للناس دي إزاي يعني؟، مفيش حد هيقصر معاهم  أبدا، وده حقهم علينا».