نجلاء الناجي تتساءل: إيه اللي يخلي الشخص ينهي حياته أو حياة غيره؟
طرحت الإعلامية نجلاء الناجي، تساؤلات حول الأسباب التي تدفع بعض الأشخاص إلى قتل الآخرين أو إنهاء حياتهم، مؤكدة ضرورة البحث في الجوانب النفسية والاجتماعية لهذه الظواهر، وعدم الاكتفاء بالعقوبات.
نجلاء الناجي: إيه اللي يخلي الشخص يقتل أو ينتحر؟
وقالت نجلاء الناجي خلال تقديمها برنامج «الرسالة»: «إيه اللي يخلينا يا جماعة نزهق روح بشر أو نزهق روح نفسنا؟ الموضوع إن إحنا عايزين نعيش حياة سوية».
وأضافت: «إمتى الشخص يلجأ إنه يقدم على إنه يقتل شخص أو يقتل روح بني آدم؟ بني آدم يقتله كده ويبقى فرحان إنه: أنا معنديش مشكلة، ومش بيبقى فيه أي مظاهر ندم، أو إنه ينتحر».
«إيه اللي وصلك لكده؟»
وتحدثت الإعلامية عن عدد من وقائع الانتحار التي أثارت حالة من الجدل، متسائلة عن الأسباب التي قد تدفع الإنسان إلى إنهاء حياته، قائلة: «إيه اللي يخلي بنت جميلة ترمي نفسها من الطابق العاشر وعندها أطفال؟ إيه اللي وصلتي له يا بنتي؟».
وتابعت: «الولد اللي رمى نفسه من فوق برج القاهرة.. إيه اللي حصل؟ وصلت لإيه يا ابني عشان توصل لده؟ واللي رمى نفسه تحت عجلات القطار؟ نماذج كتير هنفضل نعد».
وأشارت إلى أن انتشار مواقع التواصل الاجتماعي وكاميرات المراقبة ساهم في كشف العديد من الوقائع، قائلة: «السوشيال ميديا والكاميرات اللي بقت موجودة في كل حتة خلتنا نشوف أمور مفزعة».
نجلاء الناجي: «ليه اللي بيموت غيره بيعمل كده؟»
وانتقلت نجلاء الناجي للحديث عن جرائم القتل، متسائلة عن الأسباب التي تدفع شخصا إلى إنهاء حياة شخص آخر، وقالت: «للجانب الآخر اللي بيموت غيره.. ليه؟ ليه؟ مفيش حاجة حلوة حصلت ما بينكم؟».
وأضافت: «إيه الأمور اللي توصلك؟ واتحكم عليك بحكم الإعدام، استفدت إيه؟ ضيعت نفسك وضيعت أسرتك. ليه؟».
وتطرقت إلى قضية مقتل نيرة أشرف، قائلة: «عايزة أعرف مبرر، زي الحادثة الشهيرة نيرة أشرف اللي دبحها على مرمى ومسمع من الشارع للناس كلها.. إيه؟ كنت بتحبها؟ إيه؟ قالت لك ما بحبكش؟ أنا عايزة ردود منطقية».
«العقوبة مش كفاية.. لازم نفهم السبب»
وأكدت الإعلامية أن مواجهة هذه الظواهر تحتاج إلى جهود متكاملة من المتخصصين في الصحة النفسية وعلم النفس، موضحة أن العقوبات وحدها لا تمنع تكرار الأسباب التي تقود إلى العنف أو إيذاء النفس.
وقالت: «لازم كل الناس اللي بتعمل في مجال الصحة النفسية وعلم النفس لازم تحط قوانين، مش قوانين عقوبة، لا، الدولة جاهدة في ذلك الأمر وبياخدوا إعدام مفيش مشكلة، بس إحنا برضه محلناش الموضوع».
وتابعت: «عايزة كل خبراء علم النفس ومن يعمل في هذا المجال نطبق استراتيجية محكمة. أنت إزاي تلجأ تموت نفسك؟ أنت إزاي تلجأ إنك تموت غيرك؟».
واختتمت نجلاء الناجي حديثها بالإشارة إلى بعض الأفكار المرتبطة بعلم النفس والفلسفة حول تأثير الكبت والانهيار النفسي على السلوك، مؤكدة أهمية فهم الأسباب النفسية والاجتماعية للعنف والتعامل معها قبل الوصول إلى مرحلة إيذاء النفس أو الآخرين.
