تحذير من تريند "قاع الهامور".. هل هو مجرد ضحك أم ظاهرة جديدة لصناعة الرأي؟
حذر برنامج "الستات مايعرفوش يكدبوا" الذي تقدمه الإعلاميتان، منى عبدالغني، وإيمان عز الدين، من سرعة انتشار جروب "قاع الهامور" على فيسبوك، والذي تصدر السوشيال ميديا خلال ساعات مستوحيا أفكاره من شخصيات أفلام الكارتون، متسائلا عن الهدف الحقيقي وراء هذا الانتشار المفاجئ.
وقالت منى عبدالغني: "من أول موضوعاتنا النهاردة عايزين نبدأ بيها، الترند اللي انتشر على سوشيال ميديا مبارح بالليل، جروب قاع الهامور اللي قدر في وقت قصير قوي إنه يجذب مئات الآلاف من المتابعين، ومنشوراته انتشرت بشكل واسع على فيسبوك وكان فيه تفاعل كبير جدا من النجوم زي أحمد مالك ومصطفى غريب وغيرهم كتير من النجوم".
وأوضحت أن الجروب قائم بشكل أساسي على السخرية والكوميكس من مواقف الحياة اليومية، متابعة: "الناس بتدخل تشتكي من مطعم بس بطريقة شخصية من شخصيات الكارتون، أو تكتب موقف بتتعرض له يوميا بس بشخصية من سبونج بوب، وده طبعا خلى ناس كتير تشوفه خفيف دم وتدخل تتابعه".
وأشارت إلى أن السرعة الكبيرة في الانتشار تثير التساؤلات، مواصلة: "مش معنى إن جروب ساخر بيظهر فجأة إنه بالضرورة وراه هدف خفي، لكن في عصر السوشيال ميديا مهم نبقى واعيين قوي إن أي محتوى بيجمع عدد ضخم بسرعة ممكن يتحول بعد فترة من مجرد ترفيه وشيء لطيف جدا لوسيلة للتأثير على الجمهور وعلى أولادنا وتوجيه النقاش والفكر".
ومن جانبها قالت الاعلامية إيمان عز الدين: "السؤال المهم هل الجروب ده مجرد جروب هزار وكوميكس، ولا احنا قدام ظاهرة جديدة في طريق صناعة التريند وبناء جمهور على السوشيال ميديا، أنا شخصيا عندي حساسية شوية من الجروبات اللي بتظهر فجأة فقاعة كبيرة جدا جدا وتنتشر بسرعة".
وأكدت أنها لا تبحث عن نظرية مؤامرة، مشيرة: "أتمنى إنه مفيش ناس تيجي تركب على التريند أو أصحاب الجروب نفسهم يستسلموا لأي أفكار ممكن تقلب بعد كده وتروح في مساحات ما كناش متفقين عليها من البداية، احنا شوفنا زمان جروبات ظهرت بالشكل ده ثم بقت مسيسة أو تم توجيهها بعد فترة، معلش الأمر ما يسلمش احنا لازم نكون حريصين".
واختتمت حديثها بالتأكيد على أهمية وعي الجمهور، قائلة: "لحد دلوقتي ده حاجة لذيذة خالص واللطيفة خالص والضحك خالص وحاجة جميلة.
وقالت منى عبدالغني: أنا بعول على وعي الجمهور، الوعي اللي بيتفرج، الحاجة دي حلوة لبلدي ولا تضر بلدي، ولا وراها فكر سياسي ولا وراها تطرف، وراها مجرد الضحك أهلا وسهلا كلنا نضحك ونبسط، بس يبقى عندك وعي ومصحصح لنفسك".
