الإعلامية حمدية حمدي: جوزي كان بيغير لما الناس تقولي "مدام العالم يغني"
كشفت الإعلامية حمدية حمدي كواليس بدايات برنامج «العالم يغني»، الذي استمر على مدار 27 عاما، مشيرة إلى أن فكرة البرنامج جاءت لها خلال رحلة إلى الولايات المتحدة الأمريكية برفقة زوجها، بعد زواجهما.
وقالت حمدية حمدي: «مش أنا اللي كنت بتضايق، الحقيقة، لأنها كانت حاجة جديدة قوي بالنسبة لي، لكن جوزي هو اللي كان بيتضايق. كان بيقولي: يعني إيه؟ يعني دلوقتي جوزتك العالم يغني ولا إيه بالضبط؟».
وأضافت خلال لقائها في برنامج «الستات»: «البرنامج بدأت فكرته لما كنت في رحلة مع جوزي، وكان بيعمل أبحاث في أمريكا أول ما اتجوزت. لقيت إن فيه برامج غنائية كتير، وإحنا ما عندناش الكلام ده، غير في الإذاعة بس. فلما رجعت، قدمت فكرة إننا نقدم برامج لأغان أجنبية من كل بلاد العالم».
وتابعت: «قدمت الفكرة للأستاذ سعد لبيب، فعجبته وقال: بمناسبة إنكم هتقدموا أغاني من كل بلاد العالم، فنسميه "العالم يغني". وكان هو صاحب الاسم».
وأشارت إلى أن البرنامج حقق رد فعل جماهيريا كبيرا منذ بدايته، قائلة: «لقينا آلاف الناس. طبعا ما كانش فيه فيسبوك ولا حاجة، فكان فيه جوابات بتتبعت وتليفونات. يعني رد الفعل كان غير متوقع، فاتشجعنا وبقينا نحاول نجدد».
صعوبات الحصول على أغاني «العالم يغني»
وتحدثت حمدية حمدي عن الصعوبات التي واجهتها في الحصول على المواد الغنائية التي كان يعتمد عليها البرنامج، مؤكدة أن الأمر كان «صعب جدا».
وقالت: «كنا بنلاقي صعوبة قوي في الحصول على المادة، فكنا بنروح المراكز الثقافية في السفارات ودور السينما. الأغاني اللي كانت بتيجي مثلا في الأفلام الأجنبية، كنا بنستلف منهم البكرات الكبيرة قوي دي، نشيلها ونجيبها ونستخلص منها الأغاني، وبعدين نرجعها تاني».
وأضافت: «وكان فيه بعض الأغاني موجودة في المكتبة، لكن كان صعب إننا نجيب الموافقة بتاعة أصحابها، فكنا بنلاقي صعوبة جدا في الحصول على المادة».
وتابعت: «إنما الحمد لله ابتدينا نتخطى الصعوبات دي، لأن كمان الأصدقاء كانوا بيبعتولنا التسجيلات بتاعتهم اللي هم مسجلينها، فكنا بنستعين بيها برضه».
تأسيس جمعية «أصدقاء العالم يغني»
وكشفت حمدية حمدي عن تأسيس جمعية خاصة بمتابعي البرنامج، موضحة أن الفكرة جاءت بعد تزايد أعداد محبيه.
وقالت: «لما كتروا قوي الناس اللي بيشوفوا البرنامج، اقترحوا إننا نعمل جمعية اسمها "جمعية أصدقاء العالم يغني". وفعلا خدنا موافقة من الضمان الاجتماعي، وبقت جمعية معترف بيها».
