ابنة عمرو محمد علي ترثيه برسالة مؤثرة وتؤكد انتهاء الخلافات بينهما منذ عامين

حرصت نور ابنة الفنان الراحل عمرو محمد علي على إرثاء والدها برسالة مؤثرة لتؤكد بشكل رسمي انتهاء الخلافات التي حدثت بينهما قبل وفاته بعامين . 

انتهاء الخلافات بين عمرو محمد علي وابنته نور

وكتبت نور عمرو عبر صفحتها الشخصية على موقع التواصل الاجتماعي فيس بوك: للأسف عمري ما كنت من الأشخاص اللي بيعرفوا يشرحوا مشاعرهم ولا يعبروا عن اللي جواهم
جوايا كلام ومشاعر كتير ولكن كمان أحب دايما الخصوصية ودايما أحتفظ بالخصوصية في المواضيع الحساسة حتي مع أقرب الناس ليا
كل اللي اقدر أقوله إنك هتوحشنا يا شقشق و هيوحشني خفة دمك .

 
وأضافت : دايما كنت مختلف في خفة دمك وطريقة كلامك ودايما كنت بتظهر إنك قوي و مش متألم و مكنتش أبدا تشتكي
دايما كنت تضحك حتى وأنت متألم وأنا طلعالك في دي يا شقشق ، هيوحشني أول ما تشوفني تقولي شاهي حبيبة بابي و تمسك ايدي تبوسها ، هيوحشني تفاصيل صغيرة كتير مش عارفة اعبر عنها .
 

واختتمت : مش قادرة حتى اتفرج على الفيديو ده دلوقتي ولكن أنا حافظة كل كلمة فيه و فاكرة التفاصيل بالرغم إنه من سنتين أو أكتر
وفاكرة إنك قولتلي افتحي فيديو عشان أقول حاجة ونزليه وأنا وقتها قولت مش هفتح أي مواضيع قديمة تاني و حبيت إني احتفظ بالفيديو لنفسي هتوحشني أوي والله ، اسفه لو كلامي متلغبط و مش مترتب .

يُقام اليوم الأربعاء عزاء عمرو محمد علي، في المجمع الإسلامي بالشيخ زايد، حيث رحل الفنان عن عالمنا يوم الإثنين الماضي بعد صراع مع المرض.

وكانت قد شُيعت جنازة عمرو محمد علي، أول أمس الإثنين من مسجد عطاء الله السكندري بمنطقة الخليفة.

وتوفى عمرو محمد علي، عن عمر يناهز 51 عاماً، بعد صراع مع المرض في سنوات حياته الأخيرة.