عبد الناصر زيدان يكشف سر صوته المميز: «اتطردت من قنوات واتعرضت للتنمر»
كشف الإعلامي عبد الناصر زيدان تفاصيل مثيرة عن قصة صوته المميز، مؤكدا أن صوته لم يكن بهذا الشكل عندما بدأ العمل في مجال الصحافة، كما أن إصابة تعرض لها في الأحبال الصوتية كانت سببا في التغيير الذي طرأ على صوته.
عبد الناصر زيدان: صوتي كان طبيعي جدا
وقال عبد الناصر زيدان خلال ظهوره في بودكاست «ملكة التريندات» مع الإعلامية سارة مكي، المذاع عبر موقع «نيوز رووم»: «أه طبعا هو نعمة من عند الله، ولكن لما جيت في 88 حبيت أشتغل أو أتمرن صحافة والكلام ده، في الوقت ده مكنش صوتي كده، لا أنا كان صوتي طبيعي جدا».
وأضاف: «انضغطت على صوتي، فطبيا صوتي احتبس، يعني قعدت حوالي شهرين مبكلمش».
نزيف وتضخم دموي في الأحبال الصوتية
وأوضح زيدان أن الضغط على صوته تسبب في إصابته، قائلا: «حصلي نزيف على حبال الصوت وتضخم دموي، فده خلى صوتي يحتبس، كنت آجي أتكلم أحس بألم في الأحبال الصوتية».
وأشار إلى أنه توجه في ذلك الوقت إلى مستشفى المقاولون العرب، وهناك علم بوجود طبيب ألماني يمكنه تشخيص حالته.
وتابع: «الراجل الألماني ده قال لازم نعمل عملية، كان وقتها تفتيح كده، فدي من أوائل العمليات اللي اتعملت ليزر، فقال فيه تضخم دموي بيبقى زي حبة العدساية كده، للمتخصصين بيتسحب، بيرجع الصوت وبعد كده تبدأ تعمل مراحل تانية».
«كان المفروض أعمل 3 عمليات»
وكشف زيدان أنه كان من المفترض أن يخضع لثلاث عمليات، قائلا: «أنا كان من المفترض أعمل 3 عمليات؛ عملية استئصال التضخم الدموي، وبعد كده عملية تانية في الأحبال الصوتية، وعملية تجميل، كان بيقولي عشان صوتي يرجع زي ما هو، وأعمل تمارين بقى يومية».
وأضاف ضاحكا: «أنا لما صوتي رجع رحت هارب بقى، مروحتش للدكتور تاني، قلت الحمد لله».
عبد الناصر زيدان: «كنت براهن أصحابي على صوتي»
وتحدث الإعلامي الرياضي عن قوة صوته، قائلا: «أنا كنت براهن أصحابي لو حد في الدور الـ25 في برج أنده عليه يسمعني، فخدت عين محترمة بقى».
وأكد زيدان أنه تعرض للتنمر بسبب صوته، موضحا: «إرادة الله، هو اللي حصل بقى، جيت بعد كده اتعاملت مع الموضوع ده إني أنا اتعاملت برضا».
وأضاف: «ناس بتعيب عليا، على فكرة اتطردت من قنوات، وكنت أبقى على الهوا مذيع يشيلوا الإيربيس من ودني يقولولي مش عارف مين اشتكى، مين مش هينفع.. يعني تنمر أنا اتعرضت ليه».
زيدان يكشف موقفا من قناة دريم سبورت
وروى زيدان موقفا تعرض له أثناء ظهوره على قناة دريم سبورت، قائلا: «أنا كنت على الهوا في قناة دريم سبورت، وطالع قاعد خمس دقايق والضيوف معايا زي ما إحنا قاعدين أنا وإنتي كده، وراح جالي المخرج قالي: استأذنك جه تليفون، مش هنقدر نطلع بالحلقة».
وتابع: «ليه؟ ده فلان الفلاني، المسؤول فلان قال الصوت ده مينفعش يبقى مذيع، صوت مزعج»، وأنه لم يسمح لهذه المواقف بالتأثير عليه، قائلا: «عشت مرحلة من التنمر، مفيش مرة زعلت، كنت دايما بتعامل مع الموضوع ده إنه نعمة من عند الله».
«بمقدار الرضا يأتي العطاء»
وأوضح زيدان فلسفته في التعامل مع الأمور التي لا يملك الإنسان التحكم فيها، قائلا: «أي حد في الأمور اللي لا يمتلك فيها الإنسان قرار، وهي أمور قدرية من عند الله، بمقدار الرضا يأتي العطاء».
وأضاف: «مفيش مرة فكرت إن أنا أزعل، ومفيش حد زعلني، بالعكس، حتى لما اترمى الإيربيس من ودني، حتى لما مشيت من صحف أو طردوني من أماكن، أو حتى نزلوا فيا تحذير بعدم التعامل».
عبد الناصر زيدان: «بشتغل من 16 لـ18 ساعة في اليوم»
وعن أسباب تعرضه لمشكلات في بعض أماكن العمل، قال زيدان: «أنا نشيط جدا، ودايما مشكلتي في أي مكان بروحه إن مستوايا ربما يكون أعلى من اللي معايا من حيث الجد والاجتهاد».
وأوضح: «لا من الفكر ممكن تكون ناس كتير أحسن مني، بس أنا طول حياتي بشتغل من 16 لـ18 ساعة في اليوم، فده بيقلق الناس الكسالى، ودول ما أكثرهم في مهنتنا».
