"انت أزعجتنا كتير ".. سما المصري تهاجم مصطفى كامل بعد انتقاده لمحمد رمضان
هاجمت الفنانة سما المصري نقيب المهن الموسيقية مصطفى كامل بعد انتقاده وتعليقه على ما فعله محمد رمضان بالظهور عاريا في حفله الأخير بالساحل الشمالي ، مشيرة إلى أن النقيب فعل أشياء كثيرة أزعجت الجمهور.
سما المصري تهاجم مصطفى كامل
وكتبت سما المصري عبر صفحتها الشخصية على موقع التواصل الاجتماعي فيس بوك: والله وانت كمان أزعجتني لما غنيت قشطة يابا وأزعجتني لما سمعت حركات بتعملها بمناخيرك وانت مفروض نقيب... وأزعجتني جدا جدا وطعنتني في أوتار وصمامات قلبي وانت بتتكلم عن الشراقوة بطريقة مش حلوة وأنا شرقاوية
وأضافت : انت ياما أزعجتنا واحنا ساكتين وبرضو بيطلع لك تصاريح غنا وبتغني في الحفلات ، هل بعد الإزعاج دا كله انت لسه بتغني عشان انت النقيب؟؟ ولا اللي مسموح ليك مش مسموح لباقي أعضاء النقابة بما فيهم محمد رمضان؟؟ هترد علينا ولا مش هترد عشان انت نقيب؟؟ .
وفي سياق متصل ، أعرب الفنان مصطفى كامل، نقيب الموسيقيين، عن استيائه من ظهور محمد رمضان بهذا الشكل خلال إحدى حفلاته، مؤكدًا أنه سبق وحذره أكثر من مرة من تقديم هذه النوعية من التصرفات.
«نبهته بدل المرة عشرة»
وقال مصطفى كامل، خلال مداخلة في برنامج «حلوة بلادي»: «لما شوفت المشهد بتاع محمد رمضان أنا مستاء جدا، وكلمت مجلس الإدارة، ولما عملت رخصة لمحمد رمضان نبهته بدل المرة عشرة إن أنا مش هينفع معايا الحاجات دي، مش هينفع في وجودي التصرفات دي».
مصطفى كامل: لازم أخطر أشرف زكي
وأوضح نقيب الموسيقيين أنه سيخطر الدكتور أشرف زكي، نقيب المهن التمثيلية، بما حدث، قائلًا: «أنا مضطر أخطر الدكتور أشرف زكي، ولابد لنا من وقفة جادة، مش هقدر أعاقب حد غير لما أخطر الدكتور أشرف، وهو أكيد لم يرضيه اللي حصل من محمد رمضان».
«لو اتكرر مش هيغني»
وأكد مصطفى كامل أنه في حال تكرار محمد رمضان خلع ملابسه خلال الحفلات، فلن يتم السماح له بالغناء مرة أخرى طوال فترة توليه منصب نقيب الموسيقيين، وقال: «لو تكرر الفعل تاني، أي قلع لبس لمحمد رمضان، مفيش غُنا تاني طول ما أنا نقيب الموسيقيين».
«اللي حصل طعني في قلبي»
وأضاف: «لو لقطة محمد رمضان أزعجت الناس فهي طعنتني في قلبي، ولكن هفضل متماسك لحد ما أتخذ الإجراء الصحيح والسليم مع الدكتور أشرف زكي».
وأشار إلى أن النقابة سبق وسمحت لمحمد رمضان بإحياء حفلات أخرى، مؤكدا أنه إذا تكرر الأمر فلن يتم إصدار أي تصريح غناء جديد له، واختتم مصطفى كامل حديثه قائلًا: «رغم محبتي ليه، هو لو بيحبني وبيحب مصر، بالمنظر ده لا يليق».
