ياسمين صبري: قوتي في النعومة.. والدنيا عادلة وكل إنسان بيدفع ثمن اختياره
أكدت الفنانة ياسمين صبري أنها لا تحب أن تعرف نفسها بالألقاب أو المناصب، مشيرة إلى أنها ترى نفسها ببساطة «ياسمين»، الفتاة التي تحرص على تطوير نفسها ونشر الطاقة الإيجابية من حولها.
وأضافت ياسمين صبري، خلال لقائها مع بودكاست «موعد مع لميس» الذي تقدمه الإعلامية لميس الحديدي: «أنا ياسمين، بس، أنا ياسمين اللي هي البنت البسيطة من جوه، سوية، طبيعية، بحب أطور من نفسي، أحب أكون أحسن، أحب أشوف الناس اللي حوالي كويسة، أحب أشوف جمال ووفرة ونجاح وثراء، أحب أشوف حاجة حلوة».
ياسمين صبري: مصدر طاقتي الإيجابية من عند الله
وأوضحت ياسمين صبري أن مصدر طاقتها الإيجابية هو فضل الله عليها، قائلة: «من عند الله، والله العظيم بجد، الحمد لله».
وأكدت أن نظرتها المتفائلة للحياة نابعة من إيمانها بنعم الله والفرص التي يمنحها لها، مضيفة: «من كرم ربنا، الحمد لله، في كل حاجة، في الناس، في الفرص اللي موجودة، في الأبواب المفتوحة، في تسخير ربنا ليا، في كل حاجة، إزاي مكنش متفائلة إزاي؟».
«اللي أنتي مؤمنة بيه هتشوفيه»
وأشارت الفنانة إلى أن الإنسان يرى في الحياة ما يؤمن به ويقتنع به، قائلة: «أنا بؤمن اللي أنتي مقتنعة بيه هو اللي هتشوفيه... اللي أنتي مؤمنة بيه هتشوفيه».
وشددت على أهمية أن يكون تعلق الإنسان بالله وليس بالأشخاص، مضيفة: «ما تربطيهاش ببني آدمين، اربطيها بالله، فأنا إيماني بالله قوي، إنه حبيبي، إنه سندي، إنه أنا حبيبته، قولتها قبل كدة ومؤمنة بيها».
وأضافت: «عندي بركة، عندي يسر، فأموري تمشي، هو إيماني بيه كدة، الباقي ده تسخيره بقى».
ياسمين صبري: الناس بتتعب لما ترمي آمالها على الناس
واختتمت حديثها عن علاقتها بالله بالتأكيد على أن الاعتماد المفرط على الآخرين وتعليق الآمال عليهم قد يكون سببًا في كثير من المعاناة.
وقالت: «الناس بتتعب لما ترمي أمالها على الناس أو على الدنيا، لا، خطر ده، ده الشيطان بقى، ده الشيطان».
ياسمين صبري: ما عنديش مشاعر انتقام تجاه حد
وفي جانب آخر من حديثها، أكدت ياسمين صبري أنها لا تحمل مشاعر انتقام تجاه أي شخص، مشيرة إلى أن حياتها تقوم على الإيمان بعدالة الله، وأنها لا تميل إلى الصدام في تعاملاتها مع الآخرين.
وقالت ردًا على سؤال حول الانتقام: «أبداً أعوذ بالله».
وأوضحت أنها بفضل الله لا تتعرض لمواقف تدفعها إلى الانتقام، قائلة: «بفضل الله ما بيحصلش الحمد لله، تخيل بقى؟ ما هو ده التسخير، ما بيحصلش أبداً بفضل الله».
وأضافت: «وأنا كمان مش شخصية حادة، ولا عندي تصادم، أبداً».
«القوة في النعومة مش في التصادم»
وأكدت ياسمين صبري أن قوة المرأة لا تكمن في الدخول في مواجهات وصدامات، وإنما في قدرتها على التعامل بحكمة واستخدام طبيعتها، قائلة: «أنا دايماً لما بشوف ست بتتصادم أقول هي مش عارفة تستخدم فكرة إنها ست صح، القوة في النعومة مش في التصادم أبداً».
ياسمين صبري: الدنيا عادلة وكل إنسان هيدفع ثمن اختياره
وشددت الفنانة على إيمانها بأن الحياة عادلة، وأن كل إنسان سيحصل في النهاية على نتيجة أفعاله ونواياه، مضيفة: «الدنيا عادلة، أنا بشوف كدة، عادلة جداً، كما تدين تدان ولو بعد حين، ولكل امرئ ما نوى».
وتابعت: «يعني نيتك سليمة هتشوفي السليم، حد ضايقك وجاء عليكي الدنيا هتيجي عليه وهتشوفيها، مش هتيجي عليه وأنتي مش واخدة بالك، هتشوفيها عشان تقولي الله موجود، هي فيه قوانين في الدنيا، الكون ده مش عشوائي».
«عرفت الدرس ده من وأنا صغيرة»
وأكدت ياسمين صبري أنها شهدت بنفسها تحقق هذا المبدأ أكثر من مرة، قائلة: «أكيد، طبعاً، ومن زمان، وعرفت الدرس ده من وأنا صغيرة».
وأوضحت أن أولى تجاربها في إدراك عدالة الحياة كانت داخل الأسرة، مضيفة: «كنت صغيرة، وكانت حاجات في الأسرة الكبيرة، شوفت اللي بيراعي ربنا بيعمل معاه إيه، وشوفت اللي بيختار أشياء أخرى بيدفع ثمن اختياره».
