إبراهيم سعيد: أزمتي مع جوليا ولي لي بناتي لن تنتهي لأن في كذب

علق  إبراهيم سعيد نجم منتخب مصر لكرة القدم، على الجدل الذي أثير خلال الساعات الماضية بسبب طليقته وحديثها عن امتناعه عن سداد النفقة، قائلا:«عجبني جدًا المردود اللي وصل للناس، ويمكن مش دي الأزمة الوحيدة اللي أنا بعيشها، بس الواحد قال فيه ملايين غيري عندهم أزمات مع أولادهم، وربنا يوفقهم ويرجع كل واحد لأولاده سواء بنته أو ابنه، وأكيد إن شاء الله كل حاجة هتتحل».

كما أعتذر عن انفعاله في أحد المقاطع السابقة، قائلا: «أنا بس بعتذر على الانفعال بتاعي اللي كنت فيه في الفيديو السابق، بس يا جماعة أنا أب برضه، والأب لما يبقى سبب سجن أربع شهور بسبب أولاده الكبار جوليا ولي لي، طبيعي يكون في الحالة دي».

وأضاف، خلال مقطع فيديو نشره على صفحته الرسمية على موقع التواصل الاجتماعي فيسبوك: «قبل ما أتكلم على الموضوع، لأن فيه لغط وكذب كتير، وأنا مبحبش ده، وفيه ناس كتير قاعدة تتكلم، ومع احترامي للجميع، أنا مشكلتي مع أولادي الكبار، أزمتي مع جوليا إبراهيم سعيد وليلي إبراهيم سعيد، اللي هما في الجامعة دلوقتي، وكنت أتمنى إن البنات هما اللي يطلعوا يتكلموا بدل ما يروحوا المحاكم ويرفعوا 45 قضية ويبتزوني».

وتابع: «والله أنا بدفع ومع احترامي للأستاذة، هي أصلا مبقاش فيه علاقة بينا من 22 سنة، فما تربطنيش بيها أي علاقة والناس بتتكلم عن الأم، وستهم الله يرحمها كانت ست طيبة وجميلة، وكانت سند، وأنا اللي كنت بساعد في علاجها، وكنت بجيب العلاج اللي مكانتش تقدر تجيبه، والناس كلها عارفة إن ليا علاقات كويسة، وكنت ببعت العلاج لمامتها الله يرحمها، لأنها كانت تستاهل، بس أنا مبحبش الكذب، ولا يتقال يتقال إن مفيش فلوس اتبعتت، طيب الـ150 ألف جنيه اللي اتدفعوا في قسم التجمع الخامس دول مش فلوس؟ دي فلوس مثبتة ورسميا والـ150 ألف جنيه دول كانوا بسبب جوليا ولي لي».

وواصل: «خدوا بالكم أنا خلافي مع أولادي، ومع احترامي لأي حد تاني ماليش علاقة بيه، أنا اسمي مرتبط بجوليا إبراهيم سعيد ولي لي إبراهيم سعيد، وهما دول الأزمة، زي ما راحوا شهدوا في المحكمة ووقفوا قدام القاضي وقعدوا يعيطوا، رغم إن الفلوس كانت بتتبعت لهم، وكنت منزل صور قبل كده تثبت إنهم كانوا عايشين في خير ومفيش حاجة كانت بتتأخر عليهم، لكن الأزمة عدت، بس الموضوع بقى شخصي، وأولادي ضروني زي ما حبسوني، وكنت أتمنى إنهم يطلعوا يتكلموا ويردوا ويقولوا الحقيقة، إن بابا كان بيبعت فلوس».

وأكد إبرهيم سعيد أن كل النفقات اليت دفعها مثبته بشكل رسمي، قائلا: «كل حاجة مثبتة، وفيه 150 ألف جنيه، وكمان فيه فلوس اتبعتت عن طريق إنستا باي، وده هوريه دلوقتي.. وعايز جوليا ولي لي إبراهيم سعيد يطلعوا يقولوا إن ده مش صحيح لو يقدروا، لأن إنستا باي معترف بيه في مصر كلها».

وأكد أنه بذل مجهود كبير ليعيد علاقتة ببناته ، قائلا:«أنا عملت كده عشان أحاول أقرب العلاقة بيني وبين ولادي جوليا ولي لي إبراهيم سعيد، لكن للأسف الطبع مبيتغيرش، والابتزاز مبيتغيرش، والدنيا بتتغير يعني النهارده ربنا رازقك، بكرة الظروف ممكن تتغير، وأنا عندي آدم وعندي بيلا إبراهيم سعيد، وبرضه ببعتلهم، وما بتأخرش عليهم، ولما كانت عندي أزمة مرض والدتي الله يرحمها، وقعدت في المستشفى 75 يوم في الرعاية المركزة، وطبيعي كنت بصرف على علاجها، وكان معايا ولد أختي، وناس كتير ساعدتني، والحمد لله علاقتي بالكل كويسة».

وواصل: «مبتأخرش عن أولادي، وستهم كانت بتنزل تجيب لهم لبس وأكل وشرب ودي الأصول، هما عمرهم ما اتعذبوا، وآخر حاجة بعتوهالي كانت رسالة واتساب، والقصة كلها إن أزمتي مع جوليا إبراهيم سعيد ولي لي إبراهيم سعيد، اللي رافعين عليا 45 قضية ومع كامل احترامي للقضاء، أنا عارف إن ساعات الصورة بتوصل بشكل مختلف وفيه إحساس بالمظلومية وفيه حد بياخد الولاد في اتجاه معين، وأنا ماليش علاقة بده، أنا في الأول والآخر أبو جوليا إبراهيم سعيد ولي لي إبراهيم سعيد، وده الصدام اللي بيني وبينهم، وعشان الناس اللي بتتكل، الـ150 ألف جنيه اتدفعوا في قسم التجمع الخامس وده مثبت.

واستعرض إبراهيم سعيد على الهاتف عددا من التحويلات المالية والمستندات، وقال إنها تثبت إرسال مبالغ مالية إلى والدة ابنتيه، مؤكدا أن اسمها ظاهر في التحويلات، لافتا إلى هذه المستندات موجودة مع المستشار محمد رشوان، كما عرض بيانات قال إنها تخص ابنته جوليا إبراهيم سعيد أحمد داود، مؤكدا أن هذه مجرد أمثلة من مستندات أخرى يحتفظ بها.

وفي ختام الفيديو قال إنه يحب أولاده جميعا، مشيرا إلى أن علاقته بآدم إبراهيم سعيد وبيلا إبراهيم سعيد جيدة، وكذلك علاقته بوالدتهما وأنه لا يتأخر عن تلبية طلباتهم.

وأضاف أنه ما زال حزينا من موقف جوليا ولي لي، وأنه كان يتمنى منهما الاعتراف بأنه كان يرسل لهما الأموال، وأن يقولا: «ده بابا»، لكنه أكد أنه حتى الآن غير مسامح لهما على ما حدث.