جهاد جريشة: أوسكار رويز قال لمحمود وفا أنا بحبك أنت شبهي
أبرز تصريحات جهاد جريشة، الحكم الدولي السابق، مع هاني حتحوت في برنامج "مودرن سبورت" على قناة "مودرن".
- الأهلي استحق ركلة جزاء أمام سيراميكا، وده رأيي، وموجود ومثبت. بس في الآخر برضه ده رأيي من ضمن خمسة، أنا واحد من ضمن خمسة في لجنة الحكام. مينفعش أطلع في الإعلام أقول: أنا ضد اللجنة، أنا سكت.
- مرة من المرات اتصل بي المهندس أحمد مجاهد، وقال لي: "إذا كنت متخيل إن إنت هتشيل وجيه وعزب، مش هيتشالوا طول ما البشمهندس هاني موجود". قلت له: "أنا مش طرف في القصة. يا بشمهندس أحمد، أنا بشتغل وبس. اللي يقعد يقعد، واللي يمشي يمشي".
- أنا كنت موافق على إن الأندية تيجي تسمع الفار، معندكش حاجة تخاف منها. ده كان موقفي من البداية، مش وقت أزمة محمود وفا. كنت بطالب بالتحليل، ومش عيب إن يكون عندنا حكم مخطئ، لكن لازم نعترف بده. والأندية هتثق فينا لما تعرف إننا بنقول على الصح صح، وعلى الغلط غلط.
- أنا كنت رافض طلوع أوسكار على التليفزيون بعد مباراة سيراميكا والأهلي. قلت له: "ما تطلعش". قال لي: "ده الاتحاد اللي قال لي". قلت له: "غلطان، ما تطلعش".
*هاني حتحوت: بعض الناس قالوا إن أوسكار رويز كان بيحب كابتن وفا، عشان كان بيقوله دايمًا: "إنت شبهي، فأنا بحبك".*
جهاد جريشة: آه، قاله كده: "إنت شبهي، وتحركاتي وشكلي في الملعب". حصل، على فكرة، وده لا يعيب أوسكار، بس ده حصل، وده واقع. لكن أنا قلت له: "موضوع الحب والكره في الإدارة ده مش موجود، وما ينفعش يبقى موجود بأي حال من الأحوال".
