مرض النوم.. شاب يوثق رحلة معاناته ويحذر من أعراض خطيرة قد تهدد حياته

كشف شاب يدعى محمد درويش عن رحلة معاناته مع التعب والإرهاق المستمر خلال العامين الماضيين، موضحا أنه اكتشف إصابته بانقطاع النفس أثناء النوم بعد ملاحظات من زوجته وفحوصات طبية أجراها.

وكتب درويش عبر حسابه على منصة إكس: «زي ما كنت شرحت من فترة إني حاسس بتعب وإرهاق رهيب بقالي حوالي سنتين، ومفيش حاجة بتريحني، ووزني بيزيد وأنا مش باكل أصلا، ولو أكلت ممكن وجبة واحدة في اليوم، وبعمل مجهود ومش قاعد طول اليوم».

وتابع: «حاجة زيادة حصلتلي إني بقيت أشخر وأنا نايم، وأنا عمري ما كنت بشخر، مش بس كده، ده أنا مبقتش بحلم ولا حتى بحس لو حد عمل صوت جنبي! أنا كنت بصحى من صوت دبانة في أوضة تانية، ومن لمبة الراوتر لو نورت وكانت قدامي وأنا نايم».

استكمل: «بقيت أصحى من النوم مكسّل ومكسّر ومجهد وتعبان، وبنسى، والمود دايما سيئ، مش عايز أعمل حاجة غير الشغل وبس، وحتى لو هخرج بروح أقعد على القهوة، لحد ما زوجتي، حفظها الله، قالتلي: إنت وإنت نايم حسّيت إن نفسك راح مرة واحدة ومبقتش بتتنفس، فهزّيتك علشان تتنفس، أنا طنّشت وقلت عادي، يعني نايم تعبان».

تابع: «وكنت بتابع قراءات الـ Whoop كل يوم تقولي: نومك زفت، نومك قطران فدخلت أدور شوية، لقيت حد بيقول إن نفسه بيتقطع أثناء النوم، وفضلت أدور على قصص من الناس لحد ما لقيت إن الموضوع حقيقي، وإن الحكاية مش تعب عادي، دي حالة مرضية».

وقال: «نزلت تطبيق اسمه SnoreLab، بتشغّله جنبك وإنت نايم فيبدأ يسجل شخيرك ويقولك إذا كان نفسك بينقطع. كان بيطلعلي تقارير ويقولي إن شخيري بيعلى مرة واحدة جدا، وإمتى بيحصل الانقطاع، وبيحلل النوم، بس برضه مكنتش بفهم منه حاجة أوي حتى وأنا بحلل تقاريره بالـ AI».

أضاف: «وكبّرت دماغي جدا، لحد ما سافرت وحصلّي الاختناق أكتر من مرة، فقلت لما أنزل مصر هروح أكشف في مراكز النوم، وفعلا رحت، والدكتورة طلبت مني أشعة وحاجة اسمها Sleep Test أو دراسة نوم، المفروض إني أروح أقعد في مركز وأنام عندهم ويركبولي أجهزة بتراقب نشاط النوم وكل حاجة: ضغط، أكسجين، نوم، ونَفَس إلخ، فقررت أعمل الموضوع ده في البيت، وحد ييجي يركبلي الجهاز ركبت الجهاز زي ما في الصورة رقم 1».

تابع: «ونمت بيه، وطلع التقرير الصادم: النفس بينقطع عندي بمعدل أكتر من 43 مرة في الساعة، وفي مرحلة نوم الحلم وصل لـ71 مرة في الساعة، بإجمالي 389 حالة ما بين انقطاع كامل وتنفس ضحل في الليلة الواحدة وقطع النفس ده بيضطر جسمي، سبحان الله، إنه يفوق نفسه علشان يتنفس، وده لما بيوصل الأكسجين في الدم عندي لـ76٪، وأطول انقطاع وصل لـ44 ثانية».

استكمل: «التقرير حرفيا كنت بتخيل الورقة بتلطم! أنا شبه كنت بموت وأصحى تاني، 33 مرة كل ساعة بصحى صحيان بسيط من غير ما أحس، الدكتورة شافت الأرقام وكانت الصدمة: طلعت مصاب بمرض اسمه Sleep Apnea، ولازم أنام بجهاز اسمه CPAP، وظيفته إنه بيدفع هوا بضغط بسيط ثابت يحافظ على مجرى الهواء مفتوح طول الليل علشان النفس ما يتقطعش».

تابع: «وفيه منه نوع Smart زي اللي معايا، جايبه من شركة ResMed عندي هنا في ألمانيا، وبروح لهم يعملولي فحص وضبط للجهاز والقناع وده شكل الجهاز وأنا نايم بيه في الصورة رقم 2، طب إيه المشكلة أو الحل؟ عارفين حوار الفرخة ولا البيضة؟ هو ده اللي حاصل: قلة النوم والتخن بيسببوا المشكلة دي، والمشكلة دي بتسبب قلة النوم والتخن، كل اللي كان بيحصلي بقى كان بسبب إني فعليا مش بنام أنا بصحى عشرات المرات في نومي، يعني الجسم لا بيرتاح ولا بيهدى، طول اليوم شغال، ولا بيعيد البناء ولا أي حاجة».

اوضح: «هرمون الجوع بيضرب في السما، وهرمون الشبع بيقع في الأرض، والكورتيزول بيعلى، والإنسولين بيتأثر، والشخص بيكون معرض لمضاعفات صحية خطيرة، الحمد لله الذي ابتلانا، والحمد لله على نعمه لو عندك نفس الأعراض، متسكتش، وتوكل على الله وروح اكشف وخد العلاج المناسب، أي حد عنده سؤال يكتبه في الكومنت، وإن شاء الله أجاوبه في حدود علمي ومن خلال تجربتي خلال الفترة دي».

اختتم: «أنا اللي في الصور، بس بلعب في الصورة شوية علشان المهم تشوفوا شكل الأجهزة، ده ملخص الرحلة، وفيه تفاصيل أكتر بكتير، والغرض من البوست إن لو حد مش واخد باله زيي يبدأ ياخد باله».