سيد علي: سيبوا أخبار الفنانين.. في ناس مش لاقية مروحة ولا إزازة مية
انتقد الإعلامي سيد علي انشغال مواقع التواصل الاجتماعي بقضايا الفنانين وأخبار الساحل الشمالي، في ظل وجود قضايا أكثر أهمية تمس حياة المواطنين، خاصة مع موجة الحر الشديدة التي تشهدها البلاد.
وقال سيد علي، خلال تقديمه برنامج «حضرة المواطن» المذاع على قناة الحدث اليوم: «ربنا يكون في عون الناس الغلابة اللي ما عندهمش مراوح ولا تكييف.. احنا ربنا مدينا نعم كتير جدا وبنتبط وقاعدين نشتكي، بقى عمرو دياب مش عارف عمل إيه، وقاعدين بيحللوا لي في عمرو دياب، وتامر حسني بيعمل إيه، والساحل الشرير.. في ناس غلابة مش قادرة تجيب مروحة علشان الجو اللي إحنا فيه، وإحنا هايصين في الهيصة».
وأضاف: «هل هو ده اللي يشغل الرأي العام في مصر؟ الدنيا مولعة، والراجل ترامب مش عارف هيعمل إيه، والحوثيين، والبحر الأحمر، والديون اللي علينا، والجو، والأزمة الاقتصادية، وإنتوا قاعدين تكلموني في عمرو دياب وتامر حسني ومراسي.. في إيه يا جماعة؟».
وأشار إلى معاناة البسطاء الذين يعملون تحت أشعة الشمس، قائلا: «وأنا جاي مدينة الإنتاج الإعلامي في ولاد واقفين في الشارع في الحر ده، في الشمس دي، بيعملوا ذرة مشوية وبيقشروا تين عشان آخر اليوم يروح مثلا كسبان 200 جنيه».
ساعدوا الناس يا جماعه في الحر ده
ودعا إلى مساعدة هؤلاء، مضيفا: «أنا نفسي إن حد يكون في قلبه ذرة من الرحمة... يجيب ألف كاب ويمشي على الشارع يدي للناس الغلابة اللي واقفة تحت الشمس، وكل واحد فينا ينزل يحط من 5 لـ 10 إزازات مية في الفريزر، وهو نازل يحطهم في شنطة، وهو ماشي يديهم للناس، ده أضعف الإيمان».
كما وجه التحية لرجال القوات المسلحة والشرطة، قائلا: «في جنودنا في القوات المسلحة والشرطة واقفين على حدود بيحموك، وما حدش فيهم بيشتكي، ولا حد فيهم بيقول أي كلمة... حد من السوشيال ميديا افتكرهم؟ حد يقدر يقف مكانهم نص ساعة؟».
واختتم سيد علي تصريحاته بالتأكيد على أن تشكيل الرأي العام يجب ألا يخضع لما وصفه باللجان الإلكترونية أو الحملات الدعائية، قائلا: «مؤسسات منضبطة، إنما الرأي العام إنه يتشكل عن طريق تلك اللجان... والناس تمشي وراهم... في إيه؟ دعاية فجة والناس بتصدقها».
