بعد اتهامها بالسحر.. هايدي الشابوري تدافع عن عماد وتكشف مفاجأة: «لو كان ساحرلي كنت اتجوزته»

خرجت هايدي الشابوري عن صمتها برسالة مطولة عبر حسابها على موقع «فيس بوك»، دافعت فيها عن عماد، رافضة الهجوم الذي يتعرض له على مواقع التواصل الاجتماعي، ومؤكدة أنها لن تقبل الإساءة إليه بسبب أزمتها.

وكتبت هايدي: «خلاص خلصتوا، وضحك كل اللي عنده كلمتين قالهم، كلمتين علشان نقفل الموضوع ده خالص، عشان بوخ أوي، الشخص ده كان بيني وبينه عشرة وعيش وملح، ومش مدة قليلة، مدة كفيلة إني أفهمه ويفهم طباعه، فسواء كان ربنا كاتبنا لبعض أو لا، أنا مش هقبل أي إهانة تتوجه له بسببي، عشان كل اللي هو فيه ده أنا السبب فيه».

أضافت: «وياما بنات صغيرة كتير في السن، ومتعلمين تعليم عالي، بدون ذكر أسماء، اتجوزوا جوازات مقاربة للوضع ده، ولا عيب ولا حرام، الشخص ده لو فعلًا ساحرلي، كان زماني دلوقتي متجوزاه، ومسألتش في أهلي، على الأقل مكنتش هدخل مصحة، كان هيواجههم ويقولهم مراتي فين؟، بس هو مشي بالأصول، ولا هو السحر نفع عليا ومنفعش عليهم؟».

تابعت: «واحد مش متعلم هيفهم في أصول الطلاسم والتعاويذ والكلام ده اللي بيتقال! فين عقولكم؟ انجرفتوا ورا التيار، وسمعتوا من طرف بيحاول يداري على جريمته عشان الموضوع وسع، بس الحمد لله إن القانون معندهوش مبررات في الجرائم اللي زي دي».
استكملت: «إيه المشكلة أما يبقى مرّ بتجربة منجحتش، ومعاه 4 أطفال، وربنا مكتبلوش يستمر فيها؟ ربنا اللي بيألف القلوب، هندفنه بالحياة لمجرد إنه كان متجوز؟ كتير ستات اتجوزت وانفصلت بأولادها، واتجوزوا شباب مسبقش ليهم الجواز! هي حلوة للست ووحشة للراجل؟ سيبتوا الموضوع الأساسي اللي عملوه، وانجرفتوا ورا الاختيار، وده المقصود منهم، إنهم يداروا على اللي عملوه، ويربطوا ده بده، عشان كده أنا ماشية قانوني».

تابعت: «ده لو واحد مش محترم ولا ابن أصول، كان طلع واتكلم، مليون قناة كلموه في استضافة ورفض، وقالي أنا مش هشهر بيكي، عشان إنتِ المضرورة في الآخر، حتى لو ده على حساب نفسي، كل واحدة بتدور على اللي ناقصها، اللي عاوزة تتجوز منصب، واللي عاوزة تتجوز حساب في البنك، فالحمد لله أنا لقيت فيه اللي مش عندي».

وقالت: «أصل اللي هيتقفل عليا باب واحد معاه، ولا الكارنيه ولا الفيزا، اللي هيتقفل الجوهر اللي جوه، المودة والرحمة اللي ربنا كتبها علينا، الرجولة والسند، ماسكينه تريقة لمجرد إنه غلط في كلمة إنجليزي قالها، وارد، مين فينا مبيغلطش؟ والأكسنت بتاعته بتتغير، أومال بنخلص وناخد كورسات إنجليزي ليه؟ عشان نعدل من ده، الراجل ده مخدش مني جنيه، زي ما بيدعوا، ولا هيقبل على نفسه ياخد من واحدة ست فلوس».

تابعت: «أنا رقمي القومي في المحضر، وأقوالي، وهيتحروا عن جميع البنوك والبوسطة، ولو لقوا إن حسابي دخل فيه في يوم من الأيام 500 ألف بس، حتى مش مليون، وقتها ابقوا احكموا، الراجل ده صعيدي، أطيب من إنه يتعرض لكل المواجهات دي، لا متعود على مكالمات هاتفية، ولا لقاءات، ولا كل اللي أنا دخلته فيه بسببي».

اختتمت: «السوشيال ميديا دي آخر همه، صدقوني، الحس الفكاهي ده، والريتش اللي بنسعى وراه، هيزود من جبل السيئات يوم القيامة، مش هينفعكم، إنها صحيفتك يا ابن آدم، فاملأها بما شئت».