"فتحت مشروع واداينت ومحدش مدلي أيده".. استياء علي قدورة من تعثره ماديًا |فيديو
خرج مطرب المهرجانات علي قدروة عن صمته خاصة بعد 3 سنوات من الاعتزال، ليكشف عن استيائه الشديد من تعثره ماديًا، مؤكدًا أنه لم يتخذ قرارًا بالعودة إلي الغناء بعد اعتزال 3 سنوات، وذلك في مقطع فيديو عبر حسابه الرسمي على موقع التواصل الإجتماعي فيسبوك.
استياء علي قدورة من تعثره ماديًا
وقال علي قدورة معلقًا: “أنا عارف إن فيه ناس كتير هتشوف الفيديو ده وهيتكلموا وهيسألوا، بحكم إني حد على السوشيال ميديا مينفعش أكلم نفسي بس، أنا لحد دلوقتي ماخدتش أي قرار وربنا هو أعلم وأدرى باللي فيا، أنا حاولت ومحدش كلمني علشان أبطل علشان يكلمني علشان أرجع، أنا ماخدتش أي قرار خالص وربنا يثبتني بس أنا في موضوع صعب أوي، ومخدتهاش حجة من 3 سنين أنا أكيد مريت بحاجات أكتر من كده ومريت بظروف أكتر من كده وبيتهيأ لي إن دي مش حجة، تاني حاجة مفتكرش إن حدّ مدّ لي إيده لما بطلت وأكلني لقمة ولا قالي تعالى أشغلك في شركتي أو تعمل مشروع، ملقتش حد يقولي أي حاجة، 90% من اللي بيشوفوني بيفتكروا إن فلوس المهرجانات بصرف منها وبناء على ده كل الرسائل عندي عايزين مساعدات والله ما حد عايز مساعدة غيري، أنا مش بشتكي ولكن بفهمكم وجهة النظر، أنا مش عايز ولا هقبل حاجة من حد، أنا فتحت مشروعي واشتغلت زي الفل وبعدين الدنيا اتكحرتت خالص واتداينت والدنيا اتخربت معايا، والمحل هقفله آخر السنة دي لو مكنش بكرة، محدش أدرى بعباده غير ربنا، وأنا بكلم نفسي بصوتين وجوايا 2 بيتكلموا وبيحاربوا في بعض وأنا مهزوم وسطهم ومفيش كلام عارف أقوله، بس أنا حاولت في عز شهرتي وفي عز ما كنت مسموع ومش مغصوب على حاجة، ولكن أنا بجد تعبت واتداينت وخلاص بتشاف وحش لأن إحنا فعلًا في زمن بتاع مظاهر وفلوس، أنا مش طايق كلمة ولا نصيحة من حد، أنا أقرب واحد لنفسي.”
علي قدورة وعلاقته بوالدته
في سياق آخر، قد دخل مؤدي المهرجانات المعتزل علي قدورة في نوبة تأثر شديدة على الهواء، خلال حديثه عن والدته وجدته الراحلة، حيث لم يتمالك دموعه وهو يستعيد ذكريات الفقد والمعاناة.
وقال قدورة خلال مشاركته في برنامج "خط أحمر" الذي يقدمه الإعلامي محمد موسى على قناة الحدث اليوم، إن والدته كانت الأب والأم في حياته بعد رحيل والده، مؤكدا أنها تحملت مسؤولية تربيته هو وشقيقته بمفردها، ورفضت الزواج مجددا من أجل أبنائها، وأضاف: "أمي هي نور عيني.. هي كل حاجة في حياتي"، كما وصف جدته الراحلة بأنها كانت الأقرب إلى قلبه، مشيرا إلى أنها رحلت قبل أن تشهد تحولات كبيرة في حياته، طالبا من الجمهور الدعاء لها، مؤكدا أنها كانت سيدة مواظبة على الصلاة وذات قلب طيب.
