مسنة العرض الخاص لفيلم شمشون ودليلة لـ نيوز رووم: الناس بتسألني على رقم العوضي

كشفت الحاجة نجوى مسنة العرض الخاص لفيلم شمشون و دليلة، عن تفاصيل لقائها بالفنان أحمد العوضي ومساعدتها له، ولك خلال تصريحات خاصة لـ نيوز رووم: «أنا روحت للفنان أحمد العوضي عشان أطلب منه يساعدني أسدد قرضين بـ 117 ألف.. حولي 50 ألف على رقمي وأنا واقفة ولما قلتله إن الفلوس 117 قال للحارس بتاعه ياخد رقمي لكن لحد دلوقتي محدش كلمني ولا حولي باقي الفلوس الله أعلم يمكن مشغولين.. وكل الشكر للفنان أحمد العوضي ربنا يعوض عليه ويرزقه الذرية الصالحة ».

وأضافت: «كل الناس بتسألني على رقم العوضي لكن هو والله ما معايا ولو معايا مش هديه لحد دي أمانة».

وأردفت: «اخويا قالي عرتينا وناس كتير شتمتني وغلطت فيا لكن أنا بستحمل وربنا يهديهم ويفك ضيقتهم أنا مش بتمنى شيئ وحش لحد حتى لو غلط فيا». 

وكان قد فوجئ العوضي بالأمس أثناء تواجده في إحدى المولات الشهيرة في السادس من أكتوبر، من أجل مشاهدة فيلم شمشون ودليلة، بسيدة تتقدم نحوه وسط الزحام وتمسك بيده أمام الحضور، قبل أن توجه له حديث مطالبة بمساعدة لسداد قرض. 

ويُعرض حاليًا لـ أحمد العوضي في السينمات فيلم شمشون ودليلة، والذي تدور أحداثه في إطار أكشن كوميدي، ويجمعه بالفنانة مي عمر في أول بطولة مشتركة بينهما.

فيلم شمشون ودليلة، بطولة أحمد العوضي، مي عمر، عصام السقا، أحمد عصام السيد، خالد سرحان، محمود البزاوي، انتصار، خالد الصاوي، محمد ثروت، وريتال عبدالعزيز، والفيلم تأليف محمود حمدان وإخراج رؤوف السيد وإنتاج أحمد السبكي.