«غير حقيقي»..يوسف بطرس غالي يرد على اتهامات ميرفت التلاوي بشأن أموال التأمينات
رد الدكتور يوسف بطرس غالي، وزير المالية الأسبق، على ما ذكرته السفيرة ميرفت التلاوي بشأن أموال التأمينات والمعاشات في تصريحات صحفية لها قبل سنوات ، مؤكدا أن ما تردد حول أنه طلب إستثمار تلك الأموال في الخارج غير صحيح، موضحا أن القانون كان يمنع ذلك.
وقال غالي، خلال لقائه في بودكاست «موعد مع لميس»، الذي تقدمه الإعلامية لميس الحديدي، ردا على سؤالها حول اتهام السفيرة ميرفت التلاوي له بأنه دخل عليها برئيس سيتي بنك لبحث استثمار أموال التأمينات والمعاشات بالخارج: «ميرفت التلاوي كانت من أعظم السفراء في الخارجية، كانت ممتازة، أنا اتعاملت معاها لما كانت سفيرتنا في اليابان وكانت جبارة».
وأضاف: «كوزيرة تأمينات قعدت 18 شهر بس، هي بتتكلم عني على إن أنا كنت وزير مالية، أنا وقتها مكنتش وزير مالية، كنت وزير اقتصاد، لا يمكن آخد فلوس ولا يمكن أجيب رئيس سيتي بنك ولا يمكن أعمل أي حاجة، ده غير إن القانون بيمنع استثمار أموال التأمينات في خارج الديار المصرية.. ممنوع بالقانون».
وعن المبلغ الذي تم استثماره في البورصة، أوضح غالي أن الأمر جاء في إطار محاولة لدعم سوق المال خلال أزمة اقتصادية عالمية، قائلا إن الدكتور كمال الجنزوري كان رئيسا للوزراء حينها، وقال: «وقتها حصل انهيار في جنوب شرق آسيا، وقعت العملات هناك وسمعت عندنا، فحصل ضغط على العملة في مصر والبورصة بتاعتنا انهارت».
وأضاف: «كلمني الجنزوري، كنت وقتها وزير اقتصاد، والرئيس مبارك عيني وزير اقتصاد نكاية في الجنزوري».
وأوضح غالي تفاصيل الحوار مع الجنزوري قائلا: «كلمني قالي:البورصة واقعة قاعد بتعمل إيه؟.. قولتله البورصة واقعة لأن كل اللي فيها تجزئة أفراد، مفيش مؤسسات».
وتابع يوسف بطرس غالي: «قالي طب ما دخل مؤسسات.. قولتله هدخل مؤسسات، أنت محتاج شركات تأمين، التأمين والمعاشات، الناس دول بيخشوا يقعدوا، مبيتخضوش».
وأشار إلى أنه اقترح على الجنزوري التواصل مع ميرفت التلاوي لاستثمار جزء من فوائض التأمينات في البورصة بشكل مؤقت، قائلا: «قولتله شوف الدكتورة ميرفت، قولها لو عندها فوائض تحط جزء منها في البورصة، هتسند البورصة مؤقتا وفي النهاية هتكسب، دي ممكن تقعد 5 أو 6 سنين معندهاش مشكلة».
وأوضح غالي تفاصيل لقائه مع التلاوي قائلا: «كلمتها قولتلها يا ميرفت عاوزين تخشي وبتاع.. قالت:طب أخش بكام؟ قولت معرفش، شوفي أنت الفوائض بتاعتك كام».
وأضاف: «قالتلي تعالى نتناقش تعالى خد شاي عندي، ورحت، فاكر قعدنا في البلكونة عندها في الزمالك، شرحتلها التأمينات دي ماشية إزاي والفوائض ومش الفوائض».
وتابع: «قالتلي يعني أحط كام؟ قولت حطي مليار.. قالت طب أعملها إزاي؟ قولتلها تعملي تطرحي طلب لشركات مديري المحافظ وتنقي واحد أو اتنين ياخد منك الفلوس ويحطها في الأسهم اللي هتجيبلك عائد».
واختتم قائلا: «وحصل، طرحت وجابت من ضمن الشركات اللي جابتها شركة كونكورد لمحمد يونس واستثمرت والفلوس مراحتش وكان متوسط العائد 23% في السنة».
