والدة مصطفى زيكو: "بقالي شهرين ما شفتوش.. وكنت رقم واحد في حياته قبل ما يتجوز"

تحدثت والدة مصطفى زيكو عن علاقتها بابنها، مؤكدة أنها سعيدة بنجاحه رغم اشتياقها الشديد إليه، وذلك خلال لقائها مع الإعلامية ريهام سعيد.

وقالت والدة مصطفى زيكو: “أنا فرحانة بالمكان اللي هو بقى فيه، بس وحشني، وشغله واخده منه جامد، وهو بيفضل شغله عن الحياة الأسرية، بس هيجي يا رب”.

قلت له أنا نفسي أروح الاستاد

وأضافت: “اتصلت بيه وقلت له أنا نفسي أروح الاستاد، قال لي: والله يا ماما هتبقى بهدلة، وناس كتير وجمهور كتير، هتبقى بهدلة عليكي، وقالي: أنا كده كده جاي، بس أخلص الاحتفالات”.

وتابعت: “قلت له تعال بس، أنا من 20 مايو، من يوم راح المعسكر في أمريكا، وأنا ما شفتوش، ومن قبلها كمان من أول مايو كان وراه كل تلات أيام ماتش”.

واستكملت حديثها قائلة: “وحشني جدا جدا، والله ما كان يسيب حد يزعلني، ولو حد يتكلم كلمة كان هو اللي يزعق له”.

وأشارت إلى مكانتها لديه قبل زواجه، قائلة: “أنا كنت عنده في حياته رقم واحد، ومراته بقت رقم واحد دلوقتي وأنا رقم اتنين، وده عادي، أنا متقبلة كده، بس أنا أمه، وأضافت: “أنا متقبلة كده عادي، بس أنا أمه”.

وأكدت: “هو بيكلمني على طول، بس هم عشان راجعين لقاءات وبرامج وحفلات، هو مش فاضي، وأنا متقبلة ده، الشغل، وفرحانة بيه”.