هبة السويدي تكشف تطورات حالة مليكة الناجية من حريق العمرانية: «فقدت عائلتها.. وما زالت تحارب»

كشفت الدكتورة هبة السويدي، رئيس مجلس أمناء مؤسسة أهل مصر، تطورات الحالة الصحية والنفسية للطفلة مليكة، الناجية الوحيدة من حريق العمرانية الذي فقدت خلاله أسرتها.

وكتبت هبة السويدي، عبر حسابها على موقع فيس بوك: «دايما بقول للدكاترة معانا إحنا بناخد بالأسباب، لكن في النهاية الأمر كله لله وممكن حالة تكون إصابتها بالغة جدا، وربنا يكتب لها النجاة وده اللي حصل مع مليكة، الطفلة اللي عمرها 9 سنين، ضحية حريق العمرانية، اللي فقدت فيه أسرتها، واضطرت تنط من الدور السابع، وقعت في باسكت مليان أكياس زبالة، فكان سبب بعد إرادة الله إنها تنجو من كسور أو إصابات خطيرة في المخ».

أضافت: «لكل اللي بيسألوا عنها، مليكة موجودة حاليا في مستشفى أهل مصر في العناية المركزة، وبتدخل عمليات ترقيع جلد كل يومين، حروقها شديدة في الجزء السفلي من جسمها بالكامل، وللأسف لأنها مشيت وسط النيران، أصابع قدميها الكبار أصيبوا بغرغرينا، وإحنا بنبذل كل ما في وسعنا علشان نحافظ عليهم ونتجنب البتر إذا أمكن».

تابعت: «أما الأصعب، فهو حالتها النفسية، الصدمة اللي عاشتها كبيرة جدا، وهي لحد دلوقتي ما تعرفش إن جدتها، وخالتها، وأطفال خالتها اتوفوا في الحريق، وكلنا حريصين إن فريق التأهيل النفسي في المستشفى يتابع معاها ويحاول يخليها تتكلم».

اختتمت: «خالص التعازي لوالدة مليكة ولكل أفراد أسرتها، ونسأل الله أن يربط على قلوبهم، وإن شاء الله، لما مليكة تتحسن وتكون مستعدة، ولو وافقت حنتصور معاها، ونحتفل بنجاتها، دعواتكم لمليكة، ربنا يتم شفاءها على خير، ويجبر قلبها، ويكتب لها العمر والصحة والعافية».