عملية فتق بـ127 ألف جنيه.. وأسرة المريض: المستشفى احتجزنا لحين التفاوض مع شركة التأمين
هاجمت سيدة تدعى إيناس الأمير مستشفى كليوباترا 6 أكتوبر، متهمة إدارة المستشفى باحتجازها وأسرتها لساعات عقب إجراء زوجها عملية فتق، بسبب خلاف مالي مع شركة التأمين.
وكتبت إيناس الأمير، عبر حسابها على «فيس بوك»: «مستشفى كليوباترا 6 أكتوبر، سمعت كتير عن جشع المستشفيات، بس أول مرة أجربه بنفسي، دخلنا المستشفى يوم الخميس 2/7/2026 علشان جوزي، يعمل عملية الفتق، وده تبع تعاقد تأميني تابع للشغل ومغطي بنسبة 100%، وبالاتفاق بين شركة التأمين وجهة العمل».
أضافت: «خلصنا العملية، وتاني يوم بلغونا الساعة 9 إن هيتم الخروج خلال ساعة، وفاضل بس إجراءات الخروج. من هنا بدأت المشكلة، من الساعة 10 للساعة 2 إحنا محتجزين داخل المستشفى، مش عاوزين يخرجونا ولا يدولنا تصريح الخروج، بعد أسئلة كتير: إحنا ليه مبنخرجش؟ بلغونا إن حد ينزل الحسابات».
تابعت: «نزلت الحسابات، بلغوني إنهم محتاجين شركة التأمين تدفعلهم فرق فلوس عن استخدام جهاز داخل العمليات - دباسة، والمبلغ ده 27 ألف جنيه، طب يا سيدي أنا دخلي إيه؟ يرد عليّ يقولي: اضغطي على شركة التأمين توافق، ومش هتخرجوا غير لما ناخد المبلغ المذكور».
استكملت: «سؤالي هنا للمستشفى: هل أنتم اتفاجأتم إن في جهاز بيتستخدم داخل غرفة العمليات اسمه دباسة؟ هل أنتم أول مرة تعملوا العملية دي مثلا؟ طب ليه متفقتوش مع شركة التأمين على إجمالي تكلفة العملية قبل ما المريض يدخل يعملها؟ أسوأ معاملة وأسوأ تجربة عدت عليّ في حياتي، يعني عملية فتق اتكلفت 100 ألف جنيه، والجشع خلاهم طمعانين في 27 ألف زيادة كمان؟».
تابعت: «إحنا تم احتجازنا، وتم رفض خروجنا بزوجي المريض وأطفالي الاتنين، وفضلت ألف عليهم من خدمة العملاء، اللي مش موجودة أصلا، للحسابات اللي تقولي روحي قسم الموافقات، والموافقات اللي تقولي روحي الحسابات، لما ابتديت أزعق، ظهرلي دكتور بيقولي إن المستشفى غلطانة لأنهم مخدوش موافقة التأمين، وحضرتك ملكيش ذنب طب يا سيدي اديني تصريح الخروج قالي: لأ، خدي حاجتك وامشي».
أضافت: «سمعت كلامه، وأخدت شنطي ومشيت، الساعة 5 اتفاجأت إن الممرض مش عاوز يفك الكانيولا لجوزي، ونزل جري صرف العلاج من صيدلية المستشفى وخباه معاه، ورافض يدينا تقرير الإجازة المرضية، ويقولي: أصل أنتم بالنسبة للمستشفى هربانين! إحنا موظفين بنوك محترمين، بقينا هربانين من مستشفى جشعة متعرفش حاجة عن الذوق ولا الأدب».
اختتمت: «ملحوظة: الريسبشن مش موجود 90% من الوقت، الخلاصة لو عاوز تحترم كرامتك ونفسك، متقربش ناحية مستشفى كليوباترا 6 أكتوبر، وجارٍ عمل شكوى في مجلس الوزراء لإثبات الحالة واحتجازي أنا وأولادي وجوزي لمدة 6 ساعات، واحتجاز العلاج الخاص بالعملية، واحتجاز الكارنيه الطبي حتى تاريخه، رقم الغرفة: 245، وتاريخ الدخول: 2/7/2026، وتاريخ الخروج: 3/7/2026».
