محمد إمام: بنصرف الفلوس على عيالنا.. ومحبة الجمهور لا تقدر بثمن

أجاب الفنان محمد إمام على سؤال الإعلامي عمرو أديب مفاده: «بتعمل ايه بالفلوس يا محمد؟»، قائلا: «أنا عندي عيال والله، احنا نيجي اي جمبك، الحمدلله دي نعمة من عند ربنا وحياة ربنا، والفلوس مهمة أوي لإن دا أكل عيشنا ودي اللي بنصرف بيها على عيالنا». 

حب الناس لا يقدر بثمن

وأضاف، خلال لقاءه مع الإعلامي عمرو أديب، ببرنامج «الحكاية»، المذاع على قناة «إم بي سي مصر»: «بس حب الناس مهم جدا.. لإنك لما تقابل حد متعرفهوش وفجأة يدعيلك إن ربنايوفقك ويكرمك دي حاجة كبيرة جدا». 

وعلق الفنان محمد إمام على الجدل الدائم حول لقب «الأعلى أجر» في الوسط الفني، مؤكدا أن المقياس الحقيقي للنجاح هو ما تحققه الأعمال من إيرادات ومشاهدات، وليس ما يتردد عن أجور الفنانين.

وخلال اللقاء وجه الإعلامي عمرو أديب سؤالا: “من باب الجدل، بيبقى لطيف إني أبقى قاعد في لقاء وحد يقول لي: أنت الأعلى أجر، دي حاجة كويسة، لكن إيه اللي بيجيب الأعلى؟”.

وأجاب محمد إمام: «اللي بيجيب الأعلى هو الفيلم الأعلى إيرادا، والأعلى مشاهدة، دي صناعة، وعندنا نجوم كبار جدا، زي كريم عبدالعزيز وأحمد عز وغيرهم.. الناس دي تنزل بأي فيلم تجيب 200 مليون، دول نجوم كبار.. وكمان في التلفزيون عندك نجوم زي محمد رمضان والعوضي، والناس دي بتنزل تحقق مشاهدات عالية جدا».

أعلى أجر فينا مش هيوصل لنص عادل إمام

وتابع: «قالوا لي بياخدوا أجور أكتر منك، وأنا قلت: مفيش حد بياخد أعلى مني.. لكن والله لو أعلى أجر فينا مش هيوصل لنص عادل إمام».

وأكد محمد إمام أنه لا يهتم بمثل هذه الألقاب، قائلا: «الأمور دي اتاخترع لها موضوع الأعلى أجر، وأنا حتى ما افتكرش إن أبويا طلع قال أنا الأعلى أجر، كان بياخد أعلى أجر وخلاص».

واختتم حديثه قائلا: «أنا دايما بقول إن التذاكر هي المقياس، وأنا عن نفسي أبويا هو اللي صرف علي، لكن في الآخر الشعب هو اللي صرف علي، هو اللي دخلني جامعة كويسة، وهو اللي دفع التذكرة».