رشا مهدي: الزعيم عادل إمام أزال رهبة أول لقاء بكلمة واحدة
قالت الفنانة رشا مهدي، إن أول لقاء جمعها بالزعيم عادل إمام كان مصحوبا بشعور كبير بالتوتر، رغم أنها لم تكن تعتاد الإحساس بذلك في أعمالها.
وأضافت «مهدي»، خلال لقائها عبر «نغم أف أم»، :«الحقيقة بصي، أنا في الأول شوية، في العادي عمري ما كان بيحصلي التوتر ده، لكن مع الزعيم حصل لي توتر، لأنه كان المفروض عندنا مشهد مهم وكبير بينا، اللي هو باخد منه الاعترافات، وده كان مشهد كبير ومهم قوي».
وواصلت : «لكن الحقيقة هو دخل واتكلم، وخد الأمور ببساطة، واتكلمنا، وسهل الدنيا تماما، وعاوزة أقولك إن إحنا طول الوقت كنا في الكواليس قاعدين جنب بعض، وبنحكي، وبيحكي وبنتكلم في كل حاجة، بشكل إنساني وبشكل فني، وبنتكلم على المشهد اللي داخلين نصوره، وكان بيطمن جدا اللي حواليه»، مؤكدة أن هذه المعاملة الإنسانية والبسيطة ساعدتها على تجاوز رهبة اللقاء الأول، مشيرة إلى أن الزعيم عادل إمام يتمتع بشخصية قريبة من الجميع داخل موقع التصوير.
وأردفت أنها تشرفت بالعمل مع الزعيم عادل إمام في أكثر من عمل، مؤكدة أن تجربة الوقوف أمامه لها طابع خاص ومختلف، مضيفة: «الحقيقة أنا كنت محظوظة إن أنا عملت مع الزعيم مسلسلين، والمسلسلين الحمد لله كان رد فعلهما حلو جدًا، وكانت الأدوار بتاعتي مميزة، في «العراف»، كان اسمي في المسلسل حنان، وأنا فاكرة كويس جدًا رد فعل الجمهور على المسلسل بشكل عام، المسلسل كله كان جميل جدًا، ولغاية دلوقتي، رغم إني كنت مشاركة فيه، بتفرج عليه كمتفرج وبحبه جدًا».
وتابعت: «حبيت الدور جدًا، وفي نفس الوقت قدمني للناس بشكل مختلف، فأنا حقيقي كنت محظوظة جدًا، وإن المسلسل ده كمان قربني من الزعيم بشكل شخصي، اتكلمنا كتير في تفاصيل كتيرة جدًا، وكان عنده نصائح كتيرة، ومش قادرة ألخصها في جملة واحدة، لكن أهم حاجة اتعلمتها منه إن الممثل لازم يختار، ولازم يعرف يقول إمتى آه وإمتى لا».
وواصلت: «لما تشوف التزامه وحبه للمهنة، وتشوف قد إيه بيقدم الشخصية، وإزاي بيكون قريب من الناس كممثل وكفنان كبير، تعرف إنه فعلًا عظيم، الكلام عنه محتاج وقت كبير جدًا، واختصاره في كلمة صعب، لكنه فعلًا زعيم».
