ياسر إبراهيم: ميسي على عيني وعلى راسي بس كان لازم ياخد واحدة

كشف ياسر إبراهيم، مدافع النادي الأهلي، كواليس ما دار بينه وبين بالنجم الأرجنتيني ليونيل ميسي خلال مواجهة الأهلي وإنتر ميامي في بطولة كأس العالم للأندية، مؤكدا أن ما حدث جاء بسبب عدم الالتزام بمبدأ اللعب النظيف.

وقال ياسر إبراهيم، خلال حواره مع الإعلامي إبراهيم فايق، إن الواقعة بدأت في الدقائق الأخيرة من المباراة، عندما تعرض زميله مروان عطية لشد عضلي، موضحا: "الكرة كانت مع مروان عطية في نص الملعب، وكانت الدقيقة 80 حاجة تقريبا، ومروان جاله كرامب في رجله وما قدرش يشوط الكرة بره".

أخدوا الكرة وكانوا عايزين يجيبوا جون

وأضاف: "الطبيعي في الفير بلاي إنك تاخد الكرة وتطلعها بره قبل ما الحكم يصفر، لكن هم أخدوا الكرة وكانوا عايزين يجيبوا جون، وأنا عمال أجري وراهم وأقول: يا جماعة فير بلاي".

وتابع: "اتفاجأت إن ميسي لعب الكرة، وأنا عملتله كده بإيدي، وبعدها لعب الكورنر، والكرة طلعت كورنر تاني، وبعدها جه يتخانق معايا قبل ما الكرة تتلعب".

ميسي على عيني وعلى راسي

وأكد مدافع الأهلي أنه لم يتردد في التعامل بقوة داخل الملعب رغم القيمة الكبيرة لميسي، قائلا: "أنا قلت بصراحة، ميسي على عيني وعلى راسي، وقلت مفيش حاجة ملهاش حل، وكان لازم ياخد واحدة".

وأوضح أن طموحه داخل الملعب لا يتغير مهما كان اسم المنافس، قائلا: "أنا نازل عايز أكسب، هقابل ميسي، هقابل رونالدو، هقابل أي حد، أنا مش غرور والله، لكن طموحي دايما مع الأهلي أو المنتخب أو أي فريق بلعب فيه إني أكسب".

واستكمل: "أنا نازل أي ماتش، أيا كان المنافس اللي قدامي، أنا عايز أكسبك، وده طموحي".

مش هروح أفكره باللي حصل.. هو هيفتكر

وعن إمكانية أن يكون ميسي قد تذكره بعد تلك المباراة، قال ياسر إبراهيم: "ما ركزتش في الحتة دي خالص، والله ما فكرت فيها، ومش هروح أفكره، أنا بذاكر ماتش إنتر ميامي، لكن مش هروح أفكره باللي حصل".