طالبة من الغربية تتصدر الدبلومات الفندقية بالمحافظة
استقبلت أسرة الطالبة بسنت، ابنة محافظة الغربية، خبر حصولها على المركز الأول على مستوى المحافظة في الدبلومات الفندقية، في إنجاز وصفته الأسرة بأنه «حلم تحقق بعد شهور طويلة من التعب والاجتهاد».
وقالت شقيقة الطالبة في تصريح خاص لـ«نيوز روووم»: «إحنا لحد دلوقتي مش مستوعبين اللي حصل، بسنت نفسها ما كانتش متوقعة إنها تطلع الأولى على مستوى الغربية، ولا أي حد في العيلة كان متوقع. صحينا الصبح على الخبر، وفجأة لقينا التليفونات كلها شغالة والناس بتبارك، ودلوقتي هي بتتكلم مع محافظ الغربية بعد إعلان النتيجة».
وأضافت أن الأسرة كانت متواجدة في منزل الجدة بمدينة دمياط وقت إعلان النتيجة، قبل أن تتحول الأجواء إلى احتفالات عائلية كبيرة بعد التأكد من الخبر.
ومن جانبها، قالت والدة الطالبة لـ«نيوز روووم» وهي تغالب دموع السعادة: «إحنا مش مصدقين لحد دلوقتي. بنتي تعبت جدًا طول السنة، وكانت بتذاكر ليل ونهار، وكان عليها ضغط كبير جدًا. ساعات كتير كانت بتعيط من الخوف والقلق، لكن عمرها ما استسلمت».
وتابعت الأم: «كنت بقول لها دايمًا: إنتِ حياتك كلها بقت مذاكرة وعياط، لكنها كانت مصممة تحقق حلمها وتنجح. الحمد لله ربنا جبر بخاطرها وما ضيعش تعبها، وشوفنا النهارده فرحة عمرنا».
وأكدت الأسرة أن تفوق بسنت جاء نتيجة التزامها الشديد بالمذاكرة طوال العام الدراسي، حيث كانت تضع هدف التفوق نصب عينيها وتسعى لتحقيقه بكل جدية وإصرار، حتى تمكنت من الوصول إلى المركز الأول على مستوى محافظة الغربية.
واختتمت والدة الطالبة حديثها قائلة: «إن شاء الله أشوف بنتي في كلية كويسة وتحقق كل أحلامها. بشكر كل الناس اللي فرحت لنا وساندتنا، والنهارده من أسعد أيام حياتنا».
ويعد تفوق بسنت نموذجًا مشرفًا للطلاب بمحافظة الغربية، بعدما أثبتت أن الاجتهاد والإصرار قادران على صناعة النجاح وتحويل الأحلام إلى واقع، لتتوج رحلة من الكفاح بالحصول على المركز الأول في الدبلومات الفندقية على مستوى المحافظة.
