«أخيرًا اتخرجت».. خريجة إعلام الإسكندرية تفتح النار على الجامعة: استغلوا سلطتهم وضغطوا علينا
كشفت روان الشربيني، خريجة كلية الإعلام بجامعة الإسكندرية، عن تفاصيل ما وصفته بتعرض الطلاب لضغوط واستغلال للسلطة داخل الجامعة، مؤكدة أنها فضلت الصمت طوال فترة الدراسة خوفًا من التأثير على مستقبلها الأكاديمي، قبل أن تقرر الحديث بعد تخرجها دعمًا لحملة «إنقاذ الأجيال».
وقالت روان، في منشور عبر حسابها على «فيس بوك»، إنها أصبحت قادرة على التعبير عن رأيها بحرية بعد انتهاء دراستها، مؤكدة: «أخيراً اتخرجت وأقدر أتكلم من غير خوف من إن حد يشيلني المادة لمجرد إني بقول رأيي بحرية».
وأضافت: «أخيرًا اتخرجت، وأقدر أتكلم من غير خوف إن حد يشيلني المادة لمجرد إني بقول رأيي بحرية، حتى في قضية فلسطين، اللي كانت رافضة إننا حتى نغضب أو نتكلم عنها، أنا عمري في حياتي ما اتكلمت على حد وحش، بس النهارده بكسر القاعدة دي عشان أدعم حملة «إنقاذ الأجيال»، لأن اللي بيحصل من استغلال للسلطة والنفوذ جوه الجامعة، عشان يضغطوا على الطلبة ويتلاعبوا بمستقبلهم، ده شيء ما ينفعش نسكت عنه».
تابعت: «هي مش بس بتلعب بمستقبلنا، دي كمان قادرة تبوظ أعصابنا وتضغط علينا لدرجة إنها بتخلي علاقتنا ببعض كدفعة تتأثر وتتكهرب من كتر الضغط، ووصل الأمر إن فيه ناس قطعت علاقتها ببعض بسبب الضغط اللي بنعيشه، الجامعة مكان للعلم، مش ساحة لتصفية الحسابات».
استكملت: «وبصراحة، بشفق جدًا على اللي لسه شايلين مادتها، لأنهم بيعانوا من تصرفاتها، وممكن تطلع عليهم كل اللي بيحصل ده، بتمنى من كل قلبي إنهم ينجحوا ويخلصوا من الكابوس ده بأسرع وقت، وبشكر أول حد بدأ يتكلم، بجد من كل قلبي، وكل اللي كملوا بعده».
