ميرنا وليد تكشف مفاجأة: بعدت عن التمثيل عشان بناتي ميتعذبوش

كشفت الفنانة ميرنا وليد عن جانب شخصي في حياتها، مؤكدة أن بناتها مريم ومايا كانوا سبب رئيسي في التغير الكبير الذي حدث في شخصيتها، قائلة: «مايا ومريم غيروا فيا كل حاجة من يوم ولادتهم حياتي ويومي واهتماماتي اتغيرت».

اعتذرت عن شغل بسبب بناتي

وأضافت ميرنا وليد، خلال استضافتها في برنامج «ست الستات» المذاع عبر شاشة دي إم سي، مع الإعلامية جاسمين طه زكي: «أنا اعتذرت عن شغل كتير جدا علشانهم.. وهما صغيرين كمان اعتذرت عن أكتر من عمل فني عشان أكو جنبهم».

وتابعت: «أنا قررت أعمل عائلة ومش هينفع اسيبهم وأروح أكمل شغل، أنا فاكرة في مرة نزلت تصوير وكنت سامعة صوت بنتي بتعيط وضميري كان هيقتلني وروحت التصوير معطية وعيني بايظة من الدموع ومش طايقة اتعامل مع حد».

وخلال الحلقة، كشفت الفنانة ميرنا وليد، عن كواليس أغنية حبيبي يا عاشق، للنجم مدحت صالح التي تم عرضها في فيلم «شورت وفانلة وكاب» للفنان أحمد السقا، قائلة: «الموسيقار خالد حماد أصلا أنا وهو جيران وهو سمعني الأغنية وعجبتني جدا وطلبت اسمعها تاني وغنيتها معاه وخلاص قومت روحت».

سجلت الأغنية الساعة 6 الصبح

وأضافت: «صحيت تاني يوم الساعة 6 الصبح بيقولي تعالي واتقابلنا في استوديو وخلاني أغني جزء في الأغنية.. هو قالي أنتي لفتتي نظري إن الأغنية دي لازم تكون دويتيو خصوصا إن المشهد بتاعها أصلا دويتو بين البطل والبطلة وخلاني أسجل الأغنية وبالفعل عجبت الجمهور جدا والأغنية لسا مشهورة لحد وقتها ده».

خوف من مواجه الجمهور

وخلال حديثها كشفت الفنانة ميرنا وليد، عن سبب عدم دخولها مجال الغناء، مؤكدة أنها تخشى مواجهة الجمهور، قائلة: «أنا بخاف جدا من مواجهة الجمهور ودي كارثة أصلا.. لكن أنا ممكن أشارك بأغاني في أعمالي لكن خلاص إحنا خلصنا مرحلة الألبومات والكلام ده».

كما استرجعت إحدى المواقف التي وقفت فيها على المسرح في مواجهة الجمهور، مؤكدا أنها كانت في اية التوتر، قائلة: «مدحت صالح أجبرني أغني معاه في ليالي التلفزيون أغنية حبيبي يا عاشق ولما رفضت أخدني من البيت بلبس البيت وقالي شكلك كويس كدا وفعلا روحنا نغني لكن كل خطوة كنت بقرب فيها من الجمهور كان صوتي بيروح وبيختفي بجد».