الدكتور محمد الباز يوجه أسئلة لعمرو الدجوي بشأن أزمة عائلة نوال الدجوي
قال الإعلامي الدكتور محمد الباز إنه فتح ملف ما يحدث داخل عائلة الدكتورة نوال الدجوي بهدف الحفاظ على قيمتها ومكانتها كرمز بارز في مجال التعليم، مؤكدًا ضرورة إبعاد اسمها عن الخلافات المتداولة على مواقع التواصل الاجتماعي.
وأوضح الباز أنه تابع ما يكتبه عمرو الدجوي حفيد الدكتورة نوال الدجوي من ابنها شريف، مشيرًا إلى أنه رصد محاولات متكررة من جانبه للبحث عن الحقيقة، لكنه يرى أن هناك نقاطًا تحتاج إلى توضيح.
ووجه الباز 10 أسئلة مباشرة إلى عمرو الدجوي بهدف الوصول إلى الحقيقة الكاملة وفهم ما يجري داخل هذه القضية، مؤكدا أن الهدف ليس الاتهام ولكن الحصول على إجابات واضحة حول عدد من الوقائع والتطورات المرتبطة بالأزمة.
هل كان في حاجة في الجمعية دي أنتم عايزين تخبوها؟
وأوضح «الباز» أن هناك جمعية عمومية اتعملت في يونيو سنة 2024، الجمعية العمومية دي رأسها الأستاذ المحامي إيهاب عاصم، وما حدش عارف الحقيقة الظروف اللي أصبح فيها إيهاب عاصم هو محامي السيدة نوال الدجوي وعاملاله توكيلات وكانت بتثق فيه، لأنه الحقيقة الجمعية العمومية دي اللي اتعملت في يونيو 2024 تم فيها عزل نوال الدجوي وابنتها السيدة منى عن الشركة بتاعة دار التربية للخدمات التعليمية.
وتم في هذه الجمعية حاجة غريبة جداً إنها عقدت في مكان آخر بعيد عن مقرات دار التربية للخدمات التعليمية، والسؤال هنا يعني ليه اتعملت هذه الجمعية خارج مقر دار التربية للخدمات التعليمية؟ هل كان في حاجة في الجمعية دي أنتم عايزين تخبوها؟ في الجمعية دي حضرتك كان مفروض تحضر ولكن السيد أحمد الدجوي شقيقك الله يرحمه حضر بالنيابة عنك، وتم منح السيد أحمد الدجوي صلاحيات مطلقة في هذه الجمعية العمومية اللي تم فيها عزل دكتورة نوال ودكتورة منى. فإيه السبب في عقد هذه الجمعية؟ وليه عزلتوا نوال ومنى عن هذه الجمعية؟ وبأي مبرر تم منح أحمد الدجوي كل هذه الصلاحيات في الجمعية العمومية؟ والمحضر بتاع الجمعية العمومية قدامنا يعني الناس تشوفه وحضرتك تشوفه مرة تانية لأنك عارفه كويس.
هل استولى أحمد الدجوي على الأرصدة؟
وتابع هل صحيح بموجب هذه الجمعية العمومية أحمد الدجوي قدر يحط إيده على أرصدة دار التربية للخدمات التعليمية، والأرصدة دي اللي كانت بتوصل لحوالي 3 مليار و108 مليون بعملات أجنبية وبالعملة المصرية؟ مش بس كده، ده بموجب هذه الجمعية العمومية قدر أحمد الدجوي إنه يحط إيده على الشهادات البنكية والودائع الخاصة بالشركة اللي كانت بتتعامل عليها نوال الدجوي وليها توقيع خاص على هذه الشهادات البنكية والودائع. إيه اللي حصل في هذا الموضوع تحديدا؟.
هل في شبهة غسيل أموال في السحب والإيداع؟
وأشار إلي أن بعد الجمعية العمومية دي حصلت عمليات سحب وإيداع متتالية في البنك التجاري الدولي فرع أركان اللي في الشيخ زايد، وأنت عارف الحكاية دي كويس. عمليات السحب والإيداع دي كانت باسم أحمد الدجوي وباسم زوجته وباسم والدته وباسم سيادتك. هل في شبهة غسيل أموال في السحب والإيداع المتتالي لهذه الأموال؟ ده سؤال إحنا محتاجين بس نعرف الإجابة عليه.
شيك بقيمة 732 مليون
هل ممكن الأستاذ عمرو الدجوي يفسر لنا الشيكات اللي إحنا هنشوفها مع بعض دي؟ أربع شيكات وقع عليهم أحمد الدجوي منهم شيك لإيهاب عاصم بـ 362 ألف، وشيك لحضرتك لعمرو الدجوي بـ 24 مليون، وشيك تاني باسم عمرو بحوالي 70 مليون، ثم الشيك الرابع كان بقيمة 732 مليون ومحرر لاسم السيد أحمد الدجوي، الشيكات دي اتكتبت بأي غرض واتعمل بيها إيه؟ وهل أنت استخدمتم أو استخدمتم الجمعية العمومية اللي اتعملت عشان تحرروا هذه الشيكات؟.
ممكن تقول للناس فلوس اليخت ده جبتها منين؟
وأوضح «الباز» حضرتك اشتريت يخت، ربنا يباركلك في هذا اليخت، ممكن تقول للناس فلوس اليخت ده جبتها منين؟ وهل اشتريت هذا اليخت قبل ما تاخد الشيكات من أحمد شقيقك ولا بعد ما يعني خدت هذه الشيكات؟ وبعدين ثروتك قد إيه وممتلكاتك الشخصية قد إيه اللي تقدر من خلالها تشتري يخت وتشتري أشياء أخرى؟ ربنا يباركلك فيها ما حدش بيتكلم في ده.
ليه رفعت قضية حجر على الدكتورة نوال؟
وقال الباز، ليه رفعت قضية حجر على الدكتورة نوال؟ ليه ما اشتركش فيها شقيقك أحمد الدجوي؟ هل لأنه كان في خصومة قضائية بينه وبين جدته؟ لأنه الجدة لما اتعملت الجمعية العمومية وبدأت الشيكات تحرر بتوقيع أحمد الدجوي وبدأت الشيكات تتصرف فكان من الطبيعي إنها ترفع عليه دعاوى قضائية.
هل عشان في دعاوى قضائية ما كانش ينفع أحمد يشترك في قضية رفع الحجر على الدكتورة نوال؟ لأنه في اللحظة دي هيبقى طرف وصاحب مصلحة فما ينفعش يرفع القضية، فدفع بيك أنت لترفع هذه القضية؟ وقضية الحجر اللي أنت رفعتها دي هل كانت قضية مخلصة لخدمة إمبراطورية نوال الدجوي إنكم عايزين تحافظوا عليها، يعني أنتم شايفين بقى الدكتورة نوال مش قادرة تتصرف ومش قادرة تدير فأنتم بترفعوا قضية الحجر؟ وهل مناسب إنك عشان توصل لهذا الهدف ترفع قضية الحجر عليها وتشهّر بيها؟ ولا كانت رغبتكم في عزل نوال الدجوي تمامًا عشان تسيطروا على المؤسسة الضخمة دي وتديروها زي ما أنتم عايزين؟.
مين الي عمل التقارير الطبية المزورة
وتابع أن بعد رفض قضية الحجر على الدكتورة نوال، تقدر تقول للناس إيه المبرر اللي دفعكم إنكم ترفعوا قضية حجر على الدكتورة منى؟ وهل صحيح وده سؤال.. هل صحيح إنه تم تقديم تقارير طبية مزورة عشان يتحكم في قضية الحجر على الدكتورة منى يتحكم ضدها؟ مين اللي عمل هذه التقارير المزورة واتدفع فيها كام بالمناسبة؟ لأن أنت عايز الناس تعرف الحقايق فإحنا بنحاول نسألك أسئلة تجاوب عليها.
وأسألك سؤال تاني إنساني لأن الدكتورة منى بعد ما استلمت الإخطار بتاع قضية الحجر الست دخلت أوضتها ما خرجتش، ماتت بضغط نفسي فظيع جدًا عليها وإنها ما تخيلتش إنها في لحظة من اللحظات يتم رفع قضية حجر عليها. هل أنت مش شايف إنه هذه القضية كانت سبب؟ كل واحد فينا يعني عمره مكتوب وما حدش هيقدر يقول إنه في حد مات قبل معاده، لكن في أسباب.
هل بتعتقد إن قضية الحجر اللي رفعتوها على الدكتورة منى دي كانت سبب من الأسباب اللي أدت إلى وفاتها؟ وهل ده يخلينا نقول إنكم وراء موت هذه السيدة بهذه الطريقة؟ أنا بحاول بس أسأل ومنتظر الإجابة من الأستاذ عمرو.
ليه أحمد الدجوي انتحر؟
وواصل الباز هل يقدر الأستاذ عمرو يقولنا ليه أحمد الدجوي انتحر؟ تقرير النيابة بيقول إنه اللي حصل انتحار، هل يقدر يقولنا عمرو ليه شقيقه أحمد انتحر؟ هل كان خايف من حاجة؟ يعني هل كان في حاجة هو بيخشى إنها تتكشف فيتورط فتخلص من حياته بهذه الطريقة؟ هل للانتحار علاقة بالكلام اللي بيتقال عن حالته النفسية وعلاجه وسفره إلى إسبانيا ولا لأ؟ يعني الحالة النفسية للسيد أحمد الدجوي قبل انتحاره هل يقدر عمرو يكلمنا عنها ولا لأ؟.
السبب وراء انتحاره؟
ليه الأستاذ عمرو مصر رغم قرار النيابة النهائي بأنه اللي حصل انتحار، ليه مصر إن أخوه اتقتل؟ وقاعد بيقول إنه هو عايز حق أخوه، وليه أثناء الجنازة بتاعة أحمد الدجوي كان في بعض الأفراد واقفين ورافعين لافتات كاتبين عليها إنه إنجي وماهتاب اللي هم ولاد الدكتورة منى هم اللي قتلوا أحمد الدجوي؟ يعني أنت كنت بتستبق التحقيقات اللي هتحصل في الموضوع وبتقول هم اللي قتلوه رغم معرفتك بإنه انتحر؟ يعني هل بتلبسهم التهمة في نوع من التشهير بيهم، نوع من الكيد ليهم، نوع من الانتقام منهم؟ يعني إذا كنت أنت عارف إنه انتحر فليه تسبق وتتهم آخرين بأنهم كانوا السبب وراء انتحاره؟.
سبب إخفاء متعلقات أحمد الدجوي
واختتم: «بعد انتحار أحمد الدجوي اختفى تليفونه، اختفى اللاب توب بتاعه، اختفت متعلقات كتير، وخرج شخص من الفيلا بتاعته حاطط هذه المتعلقات في كيس، والمتعلقات دي وصلت لحضرتك، كان فيها إيه اللاب توب والموبايل والمتعلقات الشخصية بتاعته؟ هل كان في حاجة خايفين إنها توصل للنيابة فيتم الكشف عنها؟ ده سؤال مهم جدًا ليه تم إخفاء هذه المتعلقات؟ ويتعلق بهذا السؤال جزئية إنه بعد انتحار أحمد الدجوي والدته راحت تصرف شيكات وقالت إن أحمد حررلها هذه الشيكات قبل وفاته، فقامت السيدة الفاضلة زوجة أحمد الدجوي بتقديم بلاغ بتقول إنه دفتر الشيكات بتاع أحمد اتسرق قبل ما يموت، وهل فعلاً دفتر الشيكات اتسرق؟ ولو كان اتسرق مين اللي سرقه؟».
