المعنى الحقيقي لآية «من ضربك على خدك فاعرض له الآخر».. القس فليمون يفجر مفاجأة

أوضح القس فليمون فهمي، المقصود بمعنى آية «من ضربك على خدك فاعرض له الآخر أيضا»، قائلا: «من صغرنا دايما بنقول الآية دي وحافظينها اوي بس مش عارفين نفسرها وأحيانا نلوم نفسنا يعني واحد يضربني أقوم محوله الخد التاني وأقوله أضرب كمان؟ دا ضعف واستهانة ومذلة بس مش دا المقصود من وصية المسيح ».  

الضربة الأولى معروفة بالأذى والإهانة

وأضاف، خلال حواره عبر قناة «أون»: «هو اي الخد الآخر اللي ممكن أعرضه، طب الضربة الأولى معروفة الأذى والإهانة والضرر أي ظلم اتحطيت فيه، إنما الخد التاني المسيح بيشاور على إنك اتضربت على خدك فأنت اتأذيت فغفرت، الغفران الكامل هو الخد، ممكن الإنسان يتأذي ويسكت لكن قلبه لا يغفر، ممكن الإنسان يتهان ويفوت لكن يفضل شايلها في القلب».

تفسير قد يغير فهمك للآية

وتابع: «الخد التاني هو الغفران الكامل للإهانة والمذلة أو التجربة أو اي حاجة اتعرض ليها الإنسان في حياته واتبدى يعديها، ممكن تعدي ومتغفرش دا الخد الأول، وممكن تعدي وتغفر دا الخد التاني، إنك عديت واتأذيت وعارف إن الأذية دي صعبة ولا تغتفر بس عديت وغفرت وسامحت بقلب مملوء حب وغفران». 

التصرف بحكمة رغم معرفة مصدر الأذى

واختتم: «الخد التاني خد المعرفة يعني ممكن يحصل في حياتي ضرر معين وأعديه لإني مش عارف قيمة الضرر ومش عارف مين ضرني فأنا مضطر أعدي، لكن في حد اتحط في موقف وعنده المعرفة الكاملة مين أذاني والمعرفة الكاملة ازاي اتصرف صح وأخد حقي تالت ومتلت، لكن أنا وقفت نفسي سواء بإرادتي أو بالغصب لإن ملكوت السموات يُغصب والوصايا عشان أنفذها أحيانا بتوصلني لمرحلة إني بغصب نفسي بالإرادة الداخلية إني أنفذ الوصية اللي ممكن بالفكر البشري معرفش أعملها».