ماجد المصري: كل الدعم لمحمد هاني.. ومحمد صلاح يشرف أي حد

تحدث الفنان ماجد المصري، عن احتفالات الجماهير العربية بتأهل منتخب مصر إلى دور الـ16 بكأس العالم، قائلا: «اللي حصل امبارح كان أقل واجب تجاه مصر، متابعا: الوطن العربي كله شعب واحد، وكلنا قلب واحد، وكلنا بنحب مصر، وإحنا بنحبهم وهم كمان بيحبونا». 

وأضاف «المصري» في مداخلة ببرناتمج “الساعة 6”، على قناة “الحياة”: «اللي حصل امبارح كان وحدة وطنية على مستوى عالي جدا، وما شاء الله عليهم.. بجد كنت أتمنى أكون موجود بره مصر وأشاركهم الفرحة، ونفرح لمصر من وسط فرحتهم.. حتى لو كنت موجود في أي دولة عربية، كنت هحس إني وسط إخواتي وحبايبي، والناس كلها كانت بتفرح من قلبها، وفرحتها كانت طالعة بصدق».

المحبة بين الشعوب العربية

وواصل: «المشهد كان جميل جدا، وأثبت إن المحبة بين الشعوب العربية موجودة، وكانت فقط محتاجة مناسبة كبيرة زي دي علشان تظهر بالشكل اللي شفناه».

وعن متابعته للمباراة، قال: "اتفرجت على المباراة مع عيلتي، وكنا في مكان خارج البيت، لأني كنت راجع من السفر.. واتابعنا المباراة وسط أجواء كلها حماس، ومش عايز أقولكم على فرحة الناس بعد نهاية اللقاء. الزغاريد المصرية كانت في كل مكان، والناس كانت بتحتفل في الشوارع، وكل واحد كان بيعبر عن فرحته بطريقته

وتحدث عن ثقته في المنتخب قبل نهاية المباراة، قائلا: "كان عندي ثقة كبيرة جدا.. أنا بحب كرة القدم، وبفهم فيها كويس جدا، وكمان بلعب كورة، وعشان كده كنت شايف إن المنتخب بيلعب بأسلوب خلاني متأكد إننا هنحقق الفوز.. الأداء كان مطمئن، وكان واضح إن اللاعبين عندهم إصرار كبير، وده كان أول سبب خلاني واثق إن التأهل هيكون من نصيبنا».

رسالة دعم إلى محمد هاني

ووجّه رسالة دعم إلى محمد هاني، قائلا: "أنا بقدم كل الدعم والحب والتقدير للكابتن محمد هاني، وبقوله: إحنا كلنا معاك.. المدافع بيلعب في أخطر مكان في الملعب بعد حارس المرمى، وأي غلطة منه بيكون ثمنها كبير جدًا، ولازم نعذره. مستحيل يكون لاعب عايز يسجل في مرماه أو يقصد الغلط، لكن طبيعة مركزه إن أي خطأ بيبقى مؤثر جدا».

وأضاف: "أنا شخصيا بدعم محمد هاني، وبقوله: إنت كابتن كبير جدا، وبتحب مصر جدا، فكمل يا بطل، وإنت واحد من رموز المنتخب القومي، وإن شاء الله ربنا يوفقك في اللي جاي».

وتابع: "أتمنى إن رسالة الدعم دي تنتشر بين الناس، لأن مش كل الناس بتفهم تفاصيل كرة القدم. لاعب كبير ممكن يقدم مباراة ممتازة، وبعدها يخطئ، وده شيء طبيعي جدًا. الناس مش في مكانه علشان تحكم عليه. خطأ المدافع ثمنه غالي لأنه بيلعب في مركز حساس جدا، ولازم ندعمه بدل ما نهاجمه».

واستكمل: "كل مهاجمينا قبل كده ضيعوا أهدافا كانت مضمونة بنسبة كبيرة جدا، وده طبيعي في كرة القدم، وحصل مع لاعبين كبار.. لكن المدافع لأن مركزه حساس، بيشيل المسؤولية كلها، وبيتحاسب على أي غلطة أكتر من غيره

وأضاف: "أنا كمواطن مصري بقول للكابتن محمد هاني: إنت لاعب كبير جدا جدا، ورجل بمعنى الكلمة، وإحنا كلنا بنشجعك، وكمل، لأن اللي حصل رد فعل طبيعي جدًا، وبيحصل مع أكبر اللاعبين في العالم. حتى أعظم المهاجمين في العالم بيضيعوا فرص سهلة جدًا، وده جزء من كرة القدم."

رقي وأخلاق محمد صلاح

وتحدث عن قائد المنتخب محمد صلاح، قائلا: "شفت الفيديو بتاع محمد صلاح بعد ما حسمنا الفوز، وهو رايح يسلم على لاعبي أستراليا.. إيه الرقي ده؟ وإيه الإنسانية دي؟ وإيه الأخلاق دي؟ دي حاجة تشرف أي حد».

وأضاف: "في الوقت اللي كل الناس كانت بتحتفل، محمد صلاح راح يواسي لاعبي المنافس ويسلم عليهم.. دي قمة الشياكة والاحترام والروح الرياضية.. حس بمشاعرهم، لأن حلمهم ما اكتملش، فراح بنفسه يواسيهم ويخفف عنهم.. ده تصرف كبير، ويؤكد إنه نجم كبير داخل الملعب وخارجه."

واختتم قائلا: "محمد صلاح قيمة كبيرة، وكلنا بنتعلم منه، وكل واحد فينا بيتعلم من التاني.. وألف مبروك لمصر، وألف مبروك للوطن العربي كله، وإن شاء الله نفرح بانتصارات أكتر، وتفضل الفرحة دي مستمرة لكل المصريين والعرب