محمد حماقي: لو ما بقيتش مطرب كنت هبقى في النادي الأهلي

تحدث النجم محمد حماقي عن علاقته القديمة بكرة القدم، وكشف كيف ارتبط حبه للأهلي باللاعب طاهر أبو زيد، ولماذا يشجع منتخب الأرجنتين منذ طفولته، كما روى موقفا إنسانيا دفعه للتخلي عن حضور نهائي كأس العالم من أجل ابنته، قبل أن يتحدث عن هوايته في جمع ملصقات كأس العالم مع أسرته.

أغنيته الوطنية الخاصة بمنتخب مصر

واستعاد محمد حماقي، خلا لقاء في بودكاست، ذكريات أغنيته الوطنية الخاصة بمنتخب مصر، موضحا أنها قدمت لأول مرة خلال تصفيات كأس العالم عام 2010.

وقال: "عملنا الأغنية سنة 2010، وكنا وقتها في تصفيات كأس العالم، وكنا بنلعب النهائي في مصر، ولو كسبناه كنا هنوصل، وكنا بنلعب الجزائر. أنا كنت محضر الأغنية من قبلها بفترة، وكنت مستني المناسبة المناسبة اللي ننزلها فيها".

وأضاف: "للأسف الماتش اللي في مصر ما خلصناهوش بالنتيجة اللي تخلينا نوصل، وبقى في ماتش ثالث في السودان، وما حالفناش الحظ والجزائر هي اللي كسبت. إحنا كنا ظهرنا جزء من الأغنية في الماتش اللي قبله، فالناس قالت لي: طب إحنا خسرنا. قلت لهم: على فكرة عادي، بالعكس أنا هنزل الأغنية وقت الخسارة، لأن الأغنية بتتكلم عن قيمة مصر، مش عن ماتش كورة".

وتابع: "سواء نجحنا في الوصول أو ما حالفناش الحظ، ده مش هيقلل مننا حاجة، إحنا بلد كبيرة وعندها تاريخ كبير. والحمد لله الأغنية نجحت جدا وقتها، وفضلت تتذاع وتستخدم في المناسبات لحد النهارده".

لو ما بقيتش مطرب كنت هبقى في الأهلي

وأكد حماقي أن كرة القدم كانت شغفه الأول، وقال: "أنا لو ما كنتش مغني، كنت غالبا هحب أكون في الكورة، وممكن أبقى مدرب"، وأضاف: "لو كنت لعبت كورة، غالبا كنت هلعب في الأهلي، وكنت هلبس رقم 12".

وكشف حماقي عن السبب الحقيقي وراء انتمائه للنادي الأهلي، مؤكدا أن اللاعب طاهر أبو زيد كان صاحب الفضل في ذلك.

وقال: "من الأسباب اللي خلتني أحب الأهلي زمان طاهر أبو زيد. هو لاعب مهم جدا في تاريخ مصر، وبحس ساعات إنه ما أخدش حقه كما ينبغي".

كنت بشجع الزمالك وأنا صغير

وأضاف: "أمي وأخويا الاتنين كانوا زملكاوية جدا، ووالدي كان شغال في السعودية، فكان أغلب الوقت مش موجود، فكانوا مخليني زملكاوي زيهم، وفضلت أشجع الزمالك وأنا صغير".

وتابع: "لغاية ما شفت طاهر أبو زيد، قلت يا نهار أبيض، لا أنا هشجع الراجل ده وهشجع الأهلي عشانه. وقتها أمي استغربت جدا وقالت لي: يعني إيه تشجع الأهلي؟".

وأضاف: "استنيت أول إجازة لوالدي لما نزل مصر، وحكيت له، وهو كان أهلاوي، فقال لهم: لا، ماحدش له دعوة بيه، عايز يبقى أهلاوي يبقى أهلاوي، كل واحد يشجع اللي هو عايزه. ومن ساعتها بقيت أهلاوي، وكان نفسي ألعب في الأهلي وألبس رقم 12 لأنه كان رقم طاهر أبو زيد".

مارادونا جعلني أشجع الأرجنتين

وأشار حماقي إلى أن تشجيعه لمنتخب الأرجنتين بدأ منذ طفولته، وقال: "طول عمري بشجع الأرجنتين. زي ما طاهر أبو زيد كان سبب إني أشجع الأهلي، مارادونا كان سبب إني أشجع الأرجنتين. وإحنا الاتنين كنا شمال، وأنا شمال زيهم".

وأضاف: "أنا بحب مارادونا جدا، وبعده بحب ميسي جدا، وبالنسبة لي هما أهم لاعبين كرة قدم".