عبد الناصر زيدان غاضبا بعد غرق 9 أطفال بأسيوط للمسؤولين: لازم تـتحاكموا!
شن الإعلامي عبد الناصر زيدان هجوما حادا على المسؤولين المحليين، مطالبا بمحاكمة رئيس المدينة ومسؤول الري، على خلفية حادث سقوط تروسيكل في ترعة جنابية صدفا بمحافظة أسيوط.
وقال زيدان خلال برنامج "حلوة بلادي"، على شاشة قناة Modern MTI: «على الهواء كده والأرزاق على الله واللي يحصل معايا يحصل، أنا بطالب بمحاكمة رئيس المدينة والراجل بتاع الري، عندنا تسعة ماتوا، وجاي تقولي امبارح معالي المحافظ ادى تعليمات؟ طب ما عملتش ليه يا فندم السور ده؟».
وأضاف: «الرئيس عبد الفتاح السيسي نفسه لما وقف عند ترعة المريوطية من أربع سنين قال إن كل الترع اللي بتبقى وسط كتل سكنية لازم يتعمل لها أسوار أسمنتية لحماية الناس، وراحت الناس في ترعة المريوطية وبعديها حصلت حادثة تاني ونشرنا الفيديو».
وتابع: «رئيس المدينة جاي يكلمنا ربع ساعة ويقول الأخوة الزملاء والأخوة المواطنين والأخوة اللي عملوا وتعليمات معالي وتعليمات المحافظ، مين؟ ورئيس مدينة مين؟ وبتاع الري يقولك وعلى الفور وغرفة العمليات وعملنا وكأننا فتحنا عكا، الناس دي لازم تتحاكم لما 12 راكبين تروسيكل ينزلوا ويموت منهم تسعة».
وأوضح: «يا فندم هات المشهد للناس عشان معالي وزير التنمية المحلية يتفرج ومعالي وزير الري يتفرج، ويتخيلوا إن التسع عيال هم: أحلام مصطفى حمد الله 14 سنة، آية محمود سيد محمد 17 سنة، رحمة سيد عبد الرحمن 17 سنة، ندى حمادة سيد عبد الرحيم 10 سنين، يوسف محمود عبود فرغلي 12 سنة، حامد زين محمد عبد العليم 17 سنة، خديجة رجب هاشم فرغلي 15 سنة، إبراهيم علي أحمد عبد العليم 13 سنة، رحمة محسن فتحي هاشم 16 سنة».
وأضاف: «يا محافظ أسيوط دول داخلين على حياة، طلعوا من الامتحانات يساعدوا أهاليهم عشان 100 جنيه في اليوم، واقعين في ترعة رئيسية وسط كتلة سكنية من المفترض يتعملها سور أسمنتي، جاي امبارح حضرتك جايبلي عربيتين طوب أبيض ورحت عملت السور، ما عملتوش ليه قبل كده؟ ما عملتوش ليه قبل كده؟ الترع كلها اللي وسط كتل سكنية طبقا لتعليمات الرئيس شخصيا تتبطن عشان حماية الناس».
