أشرف العشماوي: السبعينيات من أكثر الفترات إغراءً للكتابة الروائية
قال الروائي أشرف العشماوي إن فترة السبعينيات وما قبلها، حتى فترة جمال عبد الناصر وفترة الملك فاروق، تعد من الفترات الدرامية الجميلة جدا، موضحا أن فترة أنور السادات كانت «درامية جدًا»، لأن السادات كان «رجلًا صداميا»، وخلال عشر سنوات كان يشعر أن كل يوم يشهد حدثا أو صداما سياسيا، وهو ما يجعل تلك المرحلة غزيرة ومغرية بالكتابة والتحليل، خصوصًا من الناحية الروائية.
في 67 كان عندنا روح قوية جدا
وأضاف أشرف العشماوي خلال لقاء في برنامج «رؤية أخري»، «أنا عندي تصور يبدو إنه متشائم، لكنه المتملك مني جدا، إن إحنا لما اتهزمنا في 67، اللي سميناها نكسة رغم إنها هزيمة عسكرية واضحة، كان عندنا روح قوية جدا وصلتنا لـ73، و73 حققنا نصر وإنجاز بكل المقاييس الدولية العسكرية اللي بيدرس لغاية النهارده، ومع ذلك إحنا اتهزمنا داخليا بعده».
وتابع: «إحنا نجحنا من 67 لـ73، وده انتصار الشعب وإرادته، لكن كل الإرادة دي اتهزمت بعد ما حققنا النصر، وأنا لغاية النهارده مش قادر أفهم إزاي المجتمع يبقى منهزم كده بعد 73، وإزاي تحول لمجتمع استهلاكي، ومجتمع انفتاح، ومجتمع مافهوش أي عدالة اجتماعية، وسادت فيه روح الفهلوة، وكل الفنون تراجعت في الفترة دي».
التاريخ يعيد نفسه
وأشار العشماوي إلى أن التاريخ يعيد نفسه، قائلا: «أيوه طبعا، بيحصل صعود وهبوط طول الوقت، ودلوقتي إنت بتعيشها مرة تانية، ودي حاجة حزينة، ومش عارف إيه اللي بيحصل للروح المصرية دي، وإزاي تعلى أوي وتخفت كده بالمنظر ده».
