شريف مدكور يهاجم تصرفات بعض ركاب الطائرات: «اعملوا غرامات أو اقبضوا عليهم»

طالب الإعلامي شريف مدكور شركة مصر للطيران باتخاذ إجراءات أكثر حزما تجاه الركاب الذين يقفون من مقاعدهم فور هبوط الطائرة، مؤكدًا أن ما يحدث على متن بعض الرحلات أصبح أمرا غير طبيعي.

وكتب شريف مدكور، عبر حسابه على موقع التواصل الاجتماعي فيس بوك، أنه يتمنى أن تتخذ شركة مصر للطيران إجراءات رادعة بحق الركاب الذين يخالفون تعليمات السلامة ويقفون قبل السماح لهم بذلك، مقترحًا فرض غرامات أو اتخاذ إجراءات أمنية بحق المخالفين.

وكتب نصا: «في عندي رجاء لـشركة مصر للطيران، لازم يبقى فيه حزم أكثر مع الركاب اللي بيقوموا يقفوا أول ما الطيارة تهبط، بجد، اعملوا غرامة أو يتم القبض على الراكب من أمن الطائرة، لأن اللي بيحصل ده مش طبيعي والله يكون فيه حزم عندكم بجد».

وفي وقت سابق أعلنت البلوجر فرح هريدي، عبر مقطع فيديو على حسابها على موقع «إنستجرام»، حذف الفيديو الذي كانت قد نشرته سابقًا بشأن واقعة تعرضت لها على متن إحدى رحلات شركة مصر للطيران، موضحة أن ما بدأ كمشاركة لتجربة شخصية تم تفسيره في اتجاهات مختلفة لم تكن تقصدها.

وقالت هريدي إن هدفها من نشر التجربة كان فقط نقل ما حدث معها خلال الرحلة، مؤكدة أنها لم تكن تنوي الدخول في أي جدل أو إثارة سلبية عبر مواقع التواصل الاجتماعي.

وأضافت أن الواقعة ما زالت محل تحقيق من جانب شركة مصر للطيران، معربة عن تقديرها لاهتمام الشركة بمتابعة تفاصيل الموقف.

وكشفت البلوجر فرح هريدي تفاصيل موقف تعرضت له على متن إحدى رحلات مصر للطيران، مؤكدة أنها لم تتحدث من قبل عن أي شخص أو تهاجم أحدا عبر مواقع التواصل الاجتماعي.

وقالت فرح هريدي: «عمري في حياتي ما عملت فيديو زي دا، عمري ما غلطت في حد ولا طلعت اتكلمت عن حد وحش».

هجوم على طاقم الطائرة

وأضافت: «امبارح أنا كنت راجعة على طيارة من ايجيبت اير، كنت لوحدي في الطيارة وعمالة ابعت ابديتس لصحابي أي اللي بيحصل وفاضل أد اي، كده كده مش هتوصلهم إلا لما أوصل».

وتابعت: «وكان في واحد من الكرو ميمبرز نايم في الـ 3 صفوف اللي في النص وفجأة في حتة من السقف وقعت عليه وهو نايم جمبي بالظبط، فا بعد ما اتركبت كده وأنا قاعدة صورت حته عشان بردو أبعتها لصحابي وأقولهم اي اللي بيحصل في الطيارة بما إني مسافرة لوحدي».

لقيتهم حواليا بيزعقولي

وأوضحت: «بعد ما صورت الصورة دي حد من الكرو قال انتي بتصوري وفجأة لقيت واحد ورايا وواحد قدامي وواحد جمبي وبيزعقولي، وفي راجل كبير في السن شوية كان لابس جراي وحد منهم قالي دا مدير الطقم وبدأ يقولي طلعي تليفونك دا انتي بتصوري اي ممنوع التصوير افتحي تليفونك».

طب حذف الصور من الموبايل

واستكملت: «بدأت ارتعش وأحاول اسكت عشان أنا خوفت وأنا لوحدي وفي رجالة حواليا في كل مكان بيزعقولي، فقولتله ممكن تكلمني بطريقة أحسن من دي، فقالي لا والله دي أحسن طريقة أقدر أكلمك بيها افتحي تليفونك، وأنا مش عايزة أعيط قدامهم عشان مبقاش عبيطة والمفروض أقف لنفسي وأقوله مينفعش تتكلم معايا كده بس أنا معرفتش أعمل كده».

وأضافت: «وفتحت التليفون وقالي وريني كل حاجه قولتله دي صوري ليه عايز تشوف تليفوني كله، أنا خلاص في صورة اللي صورتها دي همسحها، حد من اللي واقفين قالي افتحيلي المحذوفات وامسحيها تاني، وقولتلهم انتو ليه تبصوا في تليفوني، وأنا كل اللي عرفت أقوله ساعتها بعد إذنك كلمني بطريقة أحسن من كده، أنا بنت مسافرة لوحدي ليه يجولي يقفوا حواليا في كل مكان ويقعدوا يزعقولي، دا مش طبيعي».

تغير الموقف بعد معرفة أنها بلوجر

وأشارت إلى أنه بعد حذف الصور من هاتفها، قالت لأحد أفراد الطاقم: «متزعلش بقى لو حكيت اللي حصل دا»، ليرد عليها بحسب روايتها: «حكيتي؟ ما تحكي».

وأضافت: «راحوا سابوني ومشيوا ومعرفتش أحاول أهدى أو أبطل ارتعش، عمري ما حد في حياتي كلمني بالطريقة دي».

واختتمت حديثها قائلة: «جه فالأخر حد قالي مساء الخير يا فندم معلش حصل سوء تفاهم هو حضرتك بلوجر صح؟، دا اللي فارقله بس، قولتله مش فاهمه اي العلاقة قالي آسفين مكانش يعرف طب نعزمك على حاجة بقى، الراجل كان محترم جدا رغم إني عارفه إنه جاي عشان عرف إني بعمل فيديوهات، وكان عمال يهزر معايا وكنت هسكت بس سألته سؤال هو ليه اللي جه شخط فيا مش هو اللي جه اعتذرلي؟، قالي لا هو مشخطش فيكي، وكل اللي فارقله إني مجيبش سيرة الحتة اللي وقعت على حد نايم».