سمية درويش: رحت لمخرج أشوف كليب صليت عنده و قررت اتحجب واعتزل
حكت الفنانة سمية درويش قصتها مع إرتدائها الحجاب، قائلة: «أن قرار الحجاب كان أول معرفتي بأن عندي اضطراب لأنه كنت بفكر أفكار وحشة كتير وإني أعمل حاجه في نفسي أنا كل اللي حصلي في صلاه قومت من الصلاه لابسة الحجاب».
وأضافت، خلال لقائها عبر برنامج «كلام الناس» مع الإعلامية ياسمين عز المذاع على قناة إم بي سي مصر، «كنت بستلم كليب من المخرج يونس وأنا كنت عنده وكنت بمشي بالاسدال وبصلي الوقت بوقته فدخلت أصلي المغرب عنده فحصلي حاجة غريبة فطولت وهما لقوني اختفيت ميعرفوش أنا بعمل اي لأنه أنا كان معايا تليفون مبقولش أنا داخلة أصلي يعني».
الاسدال ده كان بتاع جدتي كنت محافظة عليه
وتابعت: «فدخل المخرج يونس عليا لقاني منهارة وقاعدة بالاسدال والاسدال ده كان بتاع جدتي كنت محافظة عليه وقولتله والنبي يا يونس أنا خلاص مش عايزة أخد الغنوة وهمشي كده بقى قالي لا بقى استني أما أطلع بيكي تريند لايف يعني انتي خلاص تدينتي عندي».
واستطردت قائلة: «مشيت ونزلت وروحت البيت وقفلت موبايلاتي اللي تقدر تجمعني بالمخرجين والفن فضلت كده سنة و 8 أشهر أول مرة وكنت مرتاحة جدا وتقربت من ربنا جدا واعتزلت الناس وبعدها رجعت تاني للفن لأنه الحياة والمسؤولية وكده وقلعت الحجاب».
واشارت: « الموضوع حصلي تاني في رمضان قعدت بقا حوالي سنه واشتغلت سكرتيرة في مكتب عقارات بس كلها خبرة كنت بحبها».
وفي سياق آخر، كشفت الفنانة سمية درويش عن سبب ابتعادها وعزلتها خلال الفترة الأخيرة الماضية، قائلة: «أنا بيجيلي كل فترة حالة من الإكتئاب شديدة والحمدلله إني مش بعمل حاجه وحشة في نفسي اللي هو بعتزل بس ولكن سبب الموضوع ده اي معرفش روحت لدكاترة كتير جدا نفسيين علشان خايفة على نفسي وعلى إبني ولكن بقى عندي رهاب اجتماعي».
وأضافت الفنانة سمية درويش، خلال لقائها عبر برنامج «كلام الناس» مع الإعلامية ياسمين عز المذاع على قناة إم بي سي مصر، أنها لم تستطع الجلوس مع أحد، موضحة: «أنا كنت إنسانة بحب الضحك جدا والحياة بقيت عايزة أفضل قاعدة بصه للاشئ وحاليا بقيت عايشة بجوار البحر ومش قادرة أرجع لحياة المدينة تاني ومش قادرة أقعد مع ناس».
