عروسة "القايمة الفاضية": جوزي سرب الرسايل اللي بنا وبعتها لرجالته وهم نشروها

انهارت العروس صاحبة واقعة "القايمة الفاضية" خلال لقاء مع الإعلامية ريهام سعيد، كاشفة تفاصيل أزمتها مع زوجها، مؤكدة أنها حاولت مرارا إنهاء الخلاف بالحوار، لكنها لم تجد أي استجابة.

لو قعد معايا 5 دقايق الموضوع كله كان اتحل

وقالت العروس إن الأزمة لم تكن معقدة كما يظن البعض، مؤكدة: «لو أنت جيت قعدت معايا 5 دقايق الموضوع كله يتحل»، مشيرة إلى أنها كانت ترسل إليه الرسائل باستمرار وتطالبه بالحضور، قائلة: «كنت ببعتله: تعال يا عمر، مراتك تعبانة، تعال شوفني، وأنا اللي هفتح الموضوع كله».

وأضافت أنها امتلكت ما يثبت موقفها، إلا أنها لم تجد أي رد من زوجها، موضحة: «والله العظيم فضلت أشحت عمر... والله بشحته، بمعنى بشحته، سواء رسايل أو مكالمات، رد علي، وما ردش».

بعت شاتاتي لرجالته

وكشفت أن أكثر ما آلمها هو تسريب المحادثات الخاصة بينهما، قائلة: «آخر صدمة إنك تاخد شاتاتي بيني وبينك وتبعتها لرجالتك، والرجالة يبعتوها لناس تانية، عيب قوي... دي كانت أكبر صدمة بالنسبة لي، لأن ده كان المفروض بيتنا، إزاي يتعرض بالشكل ده؟».

أنا معبية من زمان

وأكدت أن معاناتها لم تبدأ مؤخرا، موضحة: «الكلام ده من زمان... أنا معبية من زمان»، مشيرة إلى أنها لم تتخذ قرارها بشكل متسرع.

وأضافت: «أنا ماخدتش القرار بسرعة، كنت كل شوية أقول ادوني يومين كمان، وما تستعجلش في القرار»، مؤكدة أنها منحت نفسها فرصة للتفكير قبل اتخاذ أي خطوة.

السؤال الوحيد اللي هيجنني

وتابعت: «السؤال الوحيد اللي هيجنني... ليه عمر ماكانش بيرد علي؟»، مؤكدة أن تجاهله المستمر كان أكثر ما يؤلمها.

وأوضحت أنها منذ بداية الأزمة كانت ترى أن بعض الأمور تخص الرجال، قائلة: «دي حاجات رجالة، أنا ما بتدخلش فيها».

نزلت لقيت بابا وإخواتي في المكتب

وروت ما حدث في اليوم التالي، قائلة: «أنا تاني يوم لما نزلت كان بابا وإخواتي تحت في المكتب، وإحنا عندنا كلام الرجالة خط أحمر، مينفعش البنت تتكلم». وأضافت: «هما كانوا متعصبين، مسك إيدي ولبسني في إزاز المكتب».

أكدت أنها كانت بين الطرفين، قائلة: «أنا مش ضد حد، أنا في النص، ولا شايفة ده غلط ولا شايفة ده غلط، أنا بنت في النص، بنت مش ولد، وكل خطوة بعملها كانت محسوبة علي».