«أمازون سرقوا تحويشة عمري».. سيدة تستغيث بالرئيس بعد اختفاء 182 ألف جنيه
استغاثت سيدة مصرية تدعى لبنى زهران للرئيس عبد الفتاح السيسي من سرقة شركة أمازون لتحويشة عمرها، قائلة: «أنا ست مصرية دخلي على أدي جالي مسدج على الموبايل إني ممكن أحول رصيدي لكاش بدون أي فوايد أو رسوم إدارية من شركة فاليو، بعد كده اكتشفت إنه إيميل فيك، بس المسدج على موقع فاليو الرسمي».
اتخصم منه 81 ألف
وأضافت خلال حوارها مع الإعلامية سارة مكي في برنامج «ملكة التريندات»، عبر «نيوز رووم»: «المسدج مكانش فيها أي حاجة غير رابط، أنا مش بفتح موقع أول مرة أفتحه لا الموقع اتفتح قبل كده، بعتولي فيه احنا عايزنيك تسددي القسط، أول ما فتحت لقيت إن الأبلكيشن اتاخد منه فلوس، بفتح تاني مرة لقيت اتخصم منه 81 ألف، إذا أصبح النصب عليا في 182 ألف جنيه، عمليتين بحاجات أنا لحد النهاردة معرفش أي هي».
عملية اختراق للسيستم
وتابعت: «اتصلت بفاليو وقولتله يا جماعة أنا تمت عملية اختراق من موبايلي لو سمحتو وقفولي الكريديت بتاعتي، قعدت اتصل كتير كتير، المبلغ كبير ورهيب بالنسبالي، قالولي احنا تم إيقاف الكارت، بعدها علطول قالولي اتصلي بأمازون، اتصلت بيهم إن في عمليتين شراء معرفش هما اي، لإن لينك فاليو دخلني على أمازون».
وواصلت: «مفيش حاجة اسمها شحنة 182 ألف تتشحن وقتي، معايا إيميلات موثقة ومكتوبة بتأكد كلامي لإني مش بقول كلام في الهوا، وبالفعل تم إيقاف الشحنة وبعد 48 ساعة بتصل عشان أعرف الفلوس راحت فين، الفلوس مرجعتش ورجعت لفاليو قالوا أمازون مرجعولناش حاجة، رجعت لأمازون توهوني وقالوا إن عملية رفض الشحنات تمت من خلال فاليو، بالتالي الشحنات مش ظاهرة عندنا على سيستم أمازون».
عملية إعادة الأموال
وأكملت: «كلمت أمازون عشان أطلب الرقم المرجعي بتاع عملية إعادة الأموال، خدمة العملاء قالولي إن لما تم الاعتراض على الأوردرات من فاليو بالتالي الأرقام مش موجودة على نظام أمازون، الكلام باين إنه متناقض، دا عملي هوس أنا اتجننت، الأوردرات فين؟ فلوسي فين، حاجتي مرجعتش ليه».
مفيش فلوس رجعت من أمازون
وأوضحت: «فاليو قالو اللي نقدر نعمله إني أديكي إفادة قانونية إن مفيش فلوس رجعت من أمازون ليكي حتى الآن، خدت الإفادة وروحت الشؤون القانونية وقالي عندي إثبات رسمي من أمازون إن الشحنات اتسلمت، فقولت اتسلمت لمين؟، لما سألت الشحنة وصلت فين قالوا سرية معلومات، سرية أي وأنا مجني عليا، يبقى انتوا بتداروا على الحرامي، خدمة العملاء بتقولي أنا مجرد تاجر ببيع ميهمنيش غير إني أبيع».
وأشارت: «بلغت رسمي في شركة فاليو وروحت لحماية المستهلك عشان أعرف مسار الشحنات ومين اللي استلمها، عملت محضر في التجمع الخامس تبع النجدة ضد شركة أمازون وبلغت في الأموال العامة، المفروض عشان هي قسط فأنا المفروض أسدد 290 ألف، أنا أصلا مرتبي 8 آلاف جنيه، والمفروض القسط 12 ألف جنيه في الشهر، أول قسط أول شهر 7، يعني هسدد قسط بفوايد بحاجات مجتليش».
تحميل أمازون المسؤولية كاملة في تضليلي
ولفتت: «أنا بحمل أمازون المسؤولية كاملة في تضليلي والكذب عليا ولكل العملاء اللي ضحكو ا عليا طول الوقت اللي فات ويسكتوني ويقولولي الشحنة وقفت متخافيش، احنا الأموال اتردت كلها لفاليو وفضل الوقت يجري لحد ما بقيت في كارثة حرفيا، لإن كلها أسبوع ولازم أسدد قسط، لإما هدخل في دوامة تانية وشركات التمويل تبدأ تطاردني وتجيني عند بيتي وشغلي وفالأخر أنا مظلومة مخدتش حاجة، أصل البنك اللي دافع الفلوس كلها مش المفروض يدي لنفسه فرصة كام ساعة مراجعة يشوف العميل هيعترض على العملية وألا لا»
واختتمت: «بحمل الخطأ للشركتين بس الأكتر أمازون لأنها كسيستم وكإدارة وخدمة عملاء مش فاهمين أي حاجة، اتصلت بيهم قولتلهم مصيري هيكون زي البنت اللي قتلت نفسها بسبب القروض وشركات التمويل، هتلاقو لبنى اللي بتتصل بيكم دلوقتي هتسمعو اني انتحرت بسببكم».
