محافظ أسوان بعد أزمة عصير القصب: لا تهاون مع المخالفين وصحة المواطنين خط أحمر

سؤال يتردد في أذهان كثير من المواطنين، هو عصير القصب مغشوش؟، خاصة بعد إعلان جهاز حماية المستهلك خلال أحد حملاته الرقابية ضبط مادة تستخدم في غش عصير القصب داخل عدد من محال بيع العصائر بمحافظة القليوبية، حسبما عرضت فضائية «إكسترا نيوز» في تقرير تلفزيوني.

حقيقة عصير القصب

وقال محمد صلاح صاحب محل عصير قصب بأسوان: «عامة العصارة قدامك زي ما إنت شايف، العصير طازة تمام بيطلع مفيش المادة اللي بيقولوا عليها التيتانيوم ولا الإضافات اللي بيقولوا عليها، طبعا الزبون على حسب ما بيطلب، إذا كان سوبيا أو تمر أو قصب أو أي حاجة هو عايزها بنعملها».

أسوان مشهورة بالعصير الجميل

وأوضح المواطن عبده الأسيوطي: « كل يوم بشرب العصير ده من هنا، من كل يوم قبل الشغل وبعد الشغل والمكنة قدامك على طول ورانا بيتعصر قدامك وتشربه، صراحة عصير من أنظف العصير اللي في أسوان وأسوان كلها مشهورة بالعصير الجميل هنا، وحاجة طبيعية 100%».

عصير آمن 100%

وأشار المواطن محمد عبد الفتاح: «عصير يعني كويس وتمام، يعني 100% مفيش أي حاجة، وقدامنا كل حاجة هنا، يعني كل مكن موجود والعصار موجودة قدامنا، مافيش أي مشكلة خالص الحمد لله».

أكثر المشروبات الباردة انتشارا

ويعد عصير القصب من أكثر المشروبات الباردة انتشارا خلال فصل الصيف، حيث يقبل عليه المواطنون بكثافة في الشوارع والميادين لما يتمتع به من القدرة على ترطيب الجسم وتعويض السوائل المفقودة نتيجة ارتفاع درجة الحرارة.

محافظ أسوان يطمئن المواطنين

وأكد المهندس عمرو لاشين محافظ أسوان: «في الفترة اللي فاتت إحنا ركزنا بشكل كبير جدا على محلات العصائر الموجودة عندنا والمحلات الثانية اللي بتعمل آيس كريم أو ثلج أو ما خلافه لأن على مستوى مصر كلها كان في توجيه إن إحنا نتأكد من سلامة المواد المستخدمة في التصنيع».

وأضاف محافظ أسوان: «وفعلا نزل عندنا كذا حملة ولقينا بعض المخالفات بالفعل موجودة في مدن أسوان وإدفو وكوم أمبو ودراو وقدرنا إن إحنا ناخد معاها الإجراءات القانونية المطلوبة».

دور هيئة سلامة الغذاء

وتابع: «ومن هنا طبعا عايزين نؤكد إن هيئة سلامة الغذاء دورها مهم جدا، وشغالين معاها مش بس على موضوع العصائر، ولكن موضوع المطاعم والحاجات المستخدمة سواء في المطاعم المباشرة أو التيك أواي أو المطاعم اللي بيكون فيها نزلاء أو ضيوف اللي بيجوا لنا هنا».

لا تهاون في صحة المواطن

واختتم: «اللي إحنا عايزين نقوله لكل الناس متقلقوش، إحنا عندنا دوريات كثيرة جدا، وعندنا لجان بتنزل ومعندناش أي تهاون لأن صحة المصريين زي ما طبعا بنقول دائما هي خط أحمر، ودورنا إحنا إن إحنا نقدر، على قد ما نقدر، نوفر الغذاء الآمن السليم وفقا للضوابط والاشتراطات لجميع أهالينا في محافظة أسوان».

مادة شديدة الخطورة في القصب

ولفت أحمد السيد صاحب محل عصير قصب بأسوان: «القصب بيجينا من كوم أمبو، وبيتقشر، وبعدين بيتم عصره في العصارة، وبيتغسل وما بنحطلوش أي مواد كيميائية قدام الزبون بينزل من العصارة بيشرب مباشرةً طازة، وكل شيء تمام والحمد لله ومفيش أي مشاكل».

أما المادة المضبوطة، وهي ثاني أكسيد التيتانيوم، فتصنف على أنها مادة شديدة الخطورة وغير مصرح بتداولها أو استخدامها نهائيا من قبل الباعة الجائلين أو المنشآت الغذائية غير المؤهلة، لما قد تمثله من مخاطر على الصحة.