«نفسي أتجوز وأخلف».. منة فضالي تفتح قلبها وتتحدث عن حلم العمر

كشفت الفنانة منة فضالي عن مدى ارتباطها من داخل الوسط الفني، قائلة: «أنا مرتبطش من الوسط الفني، ويقال إن أغلب النجاحات في الوسط الفني قليلين اللي ارتبطوا ونجحوا وأغلبهم انفصلوا وكانوا فاشلين».

جيل سمير غانم لن يتكرر

وأضافت خلال حوارها في بودكاست «نغم إف إم»: «بس الجيل القديم بتاع سمير غانم ودلال عبد العزيز مش هنلاقيه دلوقتي خالص، دلوثتي عندك اي اقلب علطول». 

عايزة راجل عينه مليانة

وتابعت: «الراجل بالنسبالي يبقى كويس وعينه مليانة مشوفهوش ماشي ورا أي چيبة، متبقاش عينه زايغة بس دلوقتي بقت صعبة جدا، ويكون كريم وبيقدرني كمنة وبحبني وأكون أهم حاجة في حياته، معنديش مشكلة أبقى تاني واحدة في حياته بعد أهله».

الناس الغلط في الوقت الصح

واختتمت: «أنا بختار الناس الغلط في الوقت الصح، وممكن تلاقيني حد كويس جدا فيجيني في الوقت الغلط وأقوله لا، نفسي يبقى عندي بيت وأولاد، أنا أم جدا وحلم حياتي أخلف وأعمل بيت وأسرة بس مش عارفة أعمل دا دلوقتي، يمكن عشان قفلت الباب أوي، ماما نفسها ومنى عينها أتجوز وتشيل بيب».  

وتحدثت الفنانة منة فضالي عن بعض التعليقات على دورها في مسلسل «جعفر العمدة»، قائلة: «طلعت من غير ميكب وكان عندي كام مشهد في المسلسل إنهم بيسفوا عليا وإني عاملة شفايفي تحت بير السلم، عملت فيلر وبوتكس عشان الدور».   

صعوبة جدا في الكلام 

وأضافت خلال حوارها في بودكاست «نغم إف إم»: «كنت بلاقي صعوبة جدا في الكلام والأكل والضحك، أنا وقتها اللي جودت من نفسي وقولت ياريتك يا منة ما كنتي جودتي، مع إن الممثل دايما بيكون عايز يحط التاتش بتاعه».  

لجوء إلى التجميل لإتقان الدور

وتابعت: «أنا مش بحب التجميل وبخاف بس اضطريت أعمل كده ولما خلصت المسلسل حاولت أدوب شفايفي في نص المسلسل قالولي مينفعش خلاص، قولت يا نهار أسود هعمل المسلسل كله بيها؟، دانا قولت هعملها عشان مشهدين تلاتة».  

8 حقن للتخلص من الفيلر

واختتمت: «المشهد اللي عملته عشانه عشان أدخل عليهم وهما يسفوا عليا يبت دانتي عاملة شفايفك تحت بير السلم عند فلانة الفلانية، لإنهم عارفين إنه متجوزني عند مش حب فبحاول أجمل نفسي، هي شخصية هبلة وبت تافهة جدا، مخها اد كده، بس أنا تعبت أوي بعد ما روحت أشيلها فخدت 8 حقت عشان أدوبها، قولتلهم أبدا مش هتكرر».