«أرواح الناس مش لعبة»..ريهام سعيد تعلق على فيديو دهس فتاة بحدائق الأهرام

أعربت الإعلامية ريهام سعيد عن غضبها الشديد وحزنها إزاء واقعة دهس فتاة بائعة القهوة في منطقة حدائق الأهرام، مؤكدة أن القضية لا تتعلق بحادث سير عادي، وإنما تمس احترام القانون والحفاظ على أرواح المواطنين.

اللي مش قد القيادة ما يركبش عربية

وقالت ريهام سعيد إن هناك أشخاصا لا يجب أن يقودوا السيارات إذا لم يكونوا قادرين على تحمل مسؤولية القيادة، مضيفة: «ما تركبوش عربيات.. اللي مش قد يركب عربيات ما يركبش عربيات، والله أصل هو مش بالفلوس ومش بالقدرة ومش بكده، دي أخلاق في الآخر، ما فيش حد عنده أخلاق يعمل كده، ما فيش حد عنده ضمير».

وأضافت أن ما حدث لا يمكن النظر إليه باعتباره مجرد حادثة عابرة، موضحة: «إحنا مش بنتكلم دلوقتي في حادثة عادية، الموضوع أكبر من ذلك بكتير قوي، إحنا لازم نلتزم، ولازم نلتزم بالقانون عشان ما ينفعش أرواح الناس تروح».

انتقاد طريقة القيادة والسرعة الزائدة

وتطرقت إلى حادثة أخرى ظهرت في أحد مقاطع الفيديو لسيدة لقيت مصرعها أثناء وجودها في موقف سيارات، مشيرة إلى أن طريقة القيادة التي ظهرت في الفيديو تدل على عدم القدرة على القيادة بشكل صحيح.

وقالت: «دي بالنسبة لي أنا ما بتعرفش تسوق، مش ممكن يكون حد بيرجع بضهره بالسرعة دي، بصوا.. خبطت الست بالعربية، انت متخيل؟ أي حد فينا ممكن يبقى واقف مكانها، وبعدين رجعت فوقيها تاني، معقولة يا جماعة؟ هي ولا حست إنها خبطت واحدة؟ وبعد كده مشيت تاني».

وأضافت أن المشهد صادم ولا يمكن تصديقه، قائلة: «مش ممكن تكون دي واحدة بتعرف تسوق، ومش ممكن يكون في حد عاقل يرجع بالسرعة دي، الواحد وهو بيرجع بالعربية يفضل يبص يمين وشمال ويتأكد من كل حاجة، إنما دي خبطتها وخبطت العربية وبعد كده رجعت عليها تاني».

وأكدت أن القيادة ليست مرتبطة بالنوع أو الإمكانيات المادية، لكنها مرتبطة بالالتزام والانتباه وتحمل المسؤولية، مضيفة: «أنا ست، ومحدش يزعل مني، لكن سواء رجالة أو ستات لازم يلتزموا بالقانون ويحترموا السرعات المحددة».

رفض تبرير الحادث بعربة القهوة

وأشارت إلى أن أزمة حوادث الطرق في كثير من الأحيان تكون بسبب السرعة الزائدة، قائلة: «إحنا أزمتنا هنا السرعة، والسرعة دي مصيبة، ولد وبنت عندهم 15 سنة أو أقل أو أكتر شوية يركبوا عربية ويجروا بالمنظر ده ويخبطوا الناس».

وتابعت أن البعض قد يحاول تبرير الحادث بوجود عربة القهوة على جانب الطريق، لكنها رفضت هذا التبرير تماما، موضحة: «هيجي يقولك عربية القهوة واقفة على جنب الطريق أو مش على الرصيف، طيب ما لو ماشيين بالراحة مش هنخبطهم بالطريقة دي، ممكن تلاقي عربية واقفة بسبب عطل أو كشك أو أي حاجة على الطريق، هل نشيل كل حاجة؟».

وشددت على أن قوانين المرور والسرعات المحددة لم توضع من فراغ، بل لحماية الأرواح، قائلة: «عشان كده الدولة حاطة سرعات، وعشان كده إدارة المرور ووزارة الداخلية بتعاقب على تجاوز السرعة، لأن الأرواح اللي بتروح دي غالية».

التأثر بالضحايا ورسالة للمواطنين

وتحدثت ريهام سعيد عن إحدى ضحايا الحوادث التي كانت أما لأربعة أطفال، معربة عن تأثرها الشديد بما حدث، وقالت: «الولد ده دلوقتي قاعد من غير مامته، مامته الجميلة الصغيرة اللي ما عملتش حاجة لحد، راحت بسبب عربية جاية بسرعة».

كما علقت على تفاصيل الفيديو المتداول للحادث، مؤكدة أن السائقة بدت غير قادرة على التحكم في السيارة، قائلة: «هي خبطت الست وخبطت العربية، ولو ما حستش بالست أكيد حست بالعربية، الطبيعي إنها تقف وتفرمل، لكن هي كملت، وده معناه إنها مش عارفة تتعامل مع العربية ومش عارفة توقفها».

وأضافت: «في ناس قالت إن الفيديو بيكمل وفيه شخص بيتعلق بالعربية علشان يوقفها، يعني مش عارفة تدوس فرامل، ومش عارفة توقف العربية».

ووجهت رسالة إلى المواطنين بضرورة الالتزام بقواعد المرور وعدم الاستهانة بالسرعة، قائلة: «مش عايزين نبقى بنطلع الحوادث ونكئب نفسنا ونكئبكم على الفاضي، خلي المجهود اللي بنعمله ده له قيمة، التزموا بالسرعات المحددة واحترموا القانون».

وأضافت: «لما وزارة الداخلية تقول السرعة 50 أو 60 أو 70 يبقى نمشي بالسرعة دي، حطوا الحزام، وما تتكلموش في التليفون وإنتوا سايقين، كل الحاجات دي مش غلاسة، دي معمولة علشان نحافظ على أرواحكم وأرواح الناس التانية».